Սամվել Կարապետյանը շնորհավորել է Ամենայն Հայոց Կաթողիկոսին գահակալության 27-րդ տարեդարձի առթիվ

ԱրմԻնֆո. «Ուժեղ Հայաստան» դաշինքի առաջնորդ, գործարար Սամվել Կարապետյանը շնորհավորել է Ամենայն հայոց կաթողիկոս Գարեգին Բ-ին օծման և գահակալության 27-րդ տարեդարձի առթիվ։

Կարապետյանը հիշեցրել է, որ հայ ժողովրդի հազարամյա պատմության ընթացքում Ամենայն հայոց կաթողիկոսի օծման ընդամենը 132 դեպք է եղել։ "Առաջին Կաթողիկոսի՝ Սուրբ Գրիգոր Լուսավորչի օծումից մինչև Ձեր օծումը ձգվում է մեր ժողովրդի հոգևոր ժառանգականության անխզելի շղթան՝ բաղկացած 132 օղակից։ Այդ շղթան, ոսկե թելի նման, անցնում է հայ ժողովրդի և մեր Հայրենիքի պատմության միջով՝ սերնդեսերունդ փոխանցելով մեր հավատն ու ինքնությունը", - նշել է քաղաքական գործիչը Facebook-ի իր էջում հրապարակված ուղերձում։

Կարապետյանը Գարեգին Բ-ին մաղթել է քաջառողջություն, երկարակեցություն և անսասան տոկունություն՝ ի բարօրություն Հայոց Սուրբ Եկեղեցու, հայ ժողովրդի միասնության և Հայրենիքի բարգավաճման շարունակելու իր հայրապետական առաքելությունը։ "Թող Տերը լինի Ձեր պահապանն ու ապավենը, իսկ Ձեր հայրապետական գավազանը՝ միշտ ծաղկուն", - եզրափակել է «Ուժեղ Հայաստան» դաշինքի առաջնորդը։

Նշենք, որ 1999 թվականի հոկտեմբերի 27-ին Գարեգին Բ-ն Ազգային-եկեղեցական ժողովում ընտրվել է որպես 132-րդ Ծայրագույն պատրիարք և Ամենայն հայոց կաթողիկոս։