Հայաստանի մի շարք թանգարաններում կանցկացվեն Հովհաննես Թումանյանի ծննդյան օրվան և Գիրք նվիրելու օրվան նվիրված միջոցառումներ

Արմինֆո. Հայաստանի մի շարք թանգարաններում կանցկացվեն միջոցառումներ՝ նվիրված հայ մեծանուն բանաստեղծ, գրող, թարգմանիչ Հովհաննես Թումանյանի ծննդյան օրվան և Գիրք նվիրելու օրվան:

Մասնավորապես, Հովհաննես Թումանյանի տուն-թանգարանում միջոցառումների շարքը կմեկնարկի փետրվարի 19-ին, ժամը 15:00-ին «Գիրքը՝ հեքիաթասաց» խորագրով ծրագրով։

Ժամը 16:00-ին տեղի կունենա նշանակալի իրադարձություն՝ Հովհաննես Թումանյանի անձնական գրադարանի թվայնացված գրքերի կայքէջի հանդիսավոր ներկայացումը։ Ժամը 17:00-ին կկայանա «Կյանքը՝ գրքերեն. գիրքը և ընթերցանությունը Ռուբեն Եսայանի հայացքով» խորագրով հանդիպումը։ Օրվա եզրափակիչ ակորդը կլինի ժամը 18:00-ին նախատեսված բացառիկ ցուցադրությունը, որի շրջանակում կներկայացվի 1852 թվականին հրատարակված Երգեր գիրքը՝ մեծանուն աշուղ Սայաթ-Նովայի ստեղծագործություններով։

Եղիշե Չարենցի անվան գրականության և արվեստի թանգարանը փետրվարի 19-ին կազմակերպում է բազմաբովանդակ միջոցառումներ «ԳԱԹ գրադարանի ոճային գրքերը» խորագրով։ Այցելուների կներկայացվի ժամանակավոր ցուցադրություն, որը կներառի թանգարանի գրադարանի ուշագրավ նմուշները՝ շեշտադրելով ոչ միայն գրքի բովանդակությունը, այլև դրա գեղարվեստական ձևավորումը։ Ցուցադրությունը նպատակ ունի ցույց տալ, թե ինչպես է գիրքը դառնում արվեստի առարկա՝ կազմի, տպագրության և ձևավորման միջոցով։ Բացի այդ, կանցկացվի կրթական ծրագիր՝ նվիրված գրքի կազմի ձևավորմանը։ Մասնակիցները հնարավորություն կունենան ծանոթանալու գրքի կազմարարության «մարմարյա» կոչվող ավանդական տեխնոլոգիային՝ բացահայտելով ձեռագործ ձևավորման գաղտնիքները։

Նույն օրը, ժամը 14:00-ին (ԳԱԹ մասնաճյուղ) Դերենիկ Դեմիրճյանի տուն-թանգարանում տեղի կունենա «Գիրքը՝ օրվա հերոս» խորագրով հանդիպում գրող-հրապարակախոս Վովա Արզումանյանի հետ։ Հանդիպման ընթացքում կներկայացվի հեղինակի «Ինձ տանն եմ մոռացել» գիրքը։ Միջոցառումը խոստանում է դառնալ բաց երկխոսության հարթակ՝ ընթերցողների և հեղինակի միջև։

Փետրվարի 19-ին առանձնահատուկ միջոցառումներ են նախատեսված նաև (ԳԱԹ մասնաճյուղ) Սիլվա Կապուտիկյանի տուն-թանգարանում։ Ժամը 14:00-ին կբացվի «Նվիրում ենք գիրք» խորագրով ցուցադրություն, որտեղ կներկայացվեն Սիլվա Կապուտիկյանի տարբեր տարիներին հրատարակված գրքերը։ Ցուցադրությունը հնարավորություն կտա հետևել հեղինակի ստեղծագործական ուղուն՝ վաղ շրջանի գործերից մինչև հասուն շրջանի հրատարակություններ։ Ժամը 16:00-ին նույն վայրում կկազմակերպվի «Հովհաննես Թումանյանի ծննդյան օրը Կապուտիկյանի տանը» խորագրով միջոցառում, որը ներառում է բեմականացված ընթերցումներ դպրոցականների մասնակցությամբ։

Գիրք նվիրելու օրը լայնորեն նշվում է նաև Լոռու մարզի Դսեղ գյուղում՝ Հովհաննես Թումանյանի տուն-թանգարանում (ԳԱԹ մասնաճյուղ)։ Ժամը 12:00-ին տեղի կունենա «Թումանյանական գրքի տոն Դսեղում» խորագրով միջոցառում, որի ընթացքում կներկայացվի Թումանյանի տարբեր տարիներին հրատարակված հեքիաթների գրքերի ցուցահանդես։

Ժամը 14:00-ին Դսեղում՝ բանաստեղծի արձանի մոտ, կանցկացվի «Ծնունդդ շնորհավոր, Ամենայն հայոց բանաստեղծ» խորագրով ցերեկույթը։ Միջոցառման շրջանակում Դսեղի դպրոցականները կներկայացնեն «Մի կաթիլ մեղրը» ստեղծագործության բեմական տարբերակը։

Գորիս քաղաքում գործող Ակսել Բակունցի տուն-թանգարանում (ԳԱԹ մասնաճյուղ) ժամը 13:00-ին կանցկացվի «Նվիրում ենք գիրք» խորագրով գրական-երաժշտական հանդիսություն, իսկ ժամը 15:00-ին նախատեսված է «Թումանյանն ու Հայը» խորագրով գրական ցերեկույթ՝ Գորիսի դպրոցականների մասնակցությամբ։

Աշտարակում գործող Պերճ Պռոշյանի տուն-թանգարանում (ԳԱԹ մասնաճյուղ) ժամը 16:00-ին կանցկացվի «Գիրք նվիրելու օրը» խորագրով միջոցառում, որի ընթացքում կբացվի «Թումանյան-Պռոշյան» խորագրով ցուցահանդես․ այն կներկայացնի երկու մեծ գրողների ստեղծագործական առնչությունները և գաղափարական ընդհանրությունները։ Բացի այդ, կկազմակերպվի  ընթերցանության մրցույթ՝ նպատակաուղղված երիտասարդների ակտիվ մասնակցության խթանմանն ու  նրանց խոսքի ու վերլուծական ունակությունների զարգացմանը։

Գիրք նվիրելու օրը Խ. Աբովյանի տուն-թանգարանում հատկապես հագեցած է լինելու։ փետրվարի 19-ին, ժամը 15:00-ին Աբովյանի տուն-թանգարանում կկայանա մեծ գրողի «Ուղեգրություններ» և «Արձակ երկեր» գրքերի շնորհանդեսը։ Երկարատև դադարից հետո լույս տեսած «Ուղեգրություններ» գրքում ամփոփված են մեծ գրողի թարգմանական և ինքնուրույն ուղեգրական նոթերը, «Արձակ երկեր»-ում ՝ խոհափիլիսոփայական գործերը։ Շնորհանդեսը կուղեկցվի գրքերին առնչվող քննարկումներով, ինչպես նաև Խ. Աբովյանին նվիրված երաժշտական բացառիկ կատարումներով՝օպերային երգիչ, տենոր Հայկ Վարդանյանի եւ դաշնակահարուհի Կատարինե Հովսեփյանի մասնակցությամբ։

Փետրվարի 19-ին, ժամը 14։00-ին, թանգարան-գրադարան համագործակցության շրջանակում Ավետիք Իսահակյանի տուն-թանգարանում կկայանա Ավետիք Իսահակյանի ծննդյան 150-ամյակի առթիվ, ԿԳՄՍ նախարարության դրամաշնորհով տուն-թանգարանի կողմից հրատարակված «Ավետիք Իսահակյան» անգլերեն-հայերեն պատկերագրքի շնորհանդեսը։ Պատկերագրքում ներկայացված են տուն-թանգարանում պահվող լուսանկարներ, վավերագրեր, արխիվային նյութեր և համառոտ տեքստային մեկնաբանություններ՝ հայերեն և անգլերեն: Բացի այդ, կկայանան նաև հետևյալ գրքերի շնորհանդեսները՝ Ավիկ Իսահակյան, «Ավետիք Իսահակյան․ գիտական կենսագրություն» (մաս 2), «Ավետիք Իսահակյան» ընտրանի։ Գրադարաններին կնվիրաբերվեն թանգարանի նոր հրատարակություններից՝ նպատակ ունենալով համալրել նրանց գրքային ֆոնդը։

Փետրվար 19-ին, ժամը 15:00-ին Ալեքսանդր Սպենդիարյանի տուն-թանգարանում տեղի կունենա հանդիպում երիտասարդ գրողներ Լևոն Բեժանյանի և Միշա Մանուկյանի հետ: Միջոցառումներ կանցկացվեն նաև այլ թանգարաններում։