Արցախի քաղհասարակության ներկայացուցիչներն Ամենայն հայոց կաթողիկոսին խնդրում են փոխել ՀԱԵ Արցախի թեմի առաջնորդին

Արմինֆո. Արցախի քաղաքացիական հասարակության ներկայացուցիչները բաց նամակով դիմել են Ամենայն հայոց Գարեգին Բ կաթողիկոսին՝ ՀԱԵ Արցախի թեմի առաջնորդ Վրթանես եպիսկոպոս Աբրահամյանի վարքագծի առնչությամբ, ով միացել է Հայաստանի գործող իշխանությունների հակաեկեղեցական արշավին, և խնդրում են փոխել թեմի առաջնորդին:

Նամակում, մասնավորապես, ասվում է. «Արցախցիներս ակամայից կանգնած ենք ցավալի իրողության առաջ՝ դիմել Ձերդ Սրբությանը՝ հայտնելով մեր խորը հիասթափությունն ու զայրույթը ՀԱՍԵ Արցախի թեմի ներկայիս առաջնորդ Վրթանես եպիսկոպոս Աբրահամյանի վերջին քայլերի և հրապարակային պահվածքի վերաբերյալ։

Խիստ մտահոգիչ և անասելի վիրավորական էր բոլորիս համար տեսնել, թե ինչպես է Վրթանես եպիսկոպոս Աբրահամյանը, խախտելով մեր Սուրբ Եկեղեցու օրենքները, փաստացի ըմբոստացել ազգընտիր և օծյալ Ամենայն Հայոց Հայրապետի դեմ, ով մշտապես իր անքակտելի ուշադրության կենտրոնում է պահել ու պահում Արցախ աշխարհի և արցախահայության խնդիրները՝ հանդես գալով մեր իրավունքների պաշտպանության կարևորագույն նախաձեռնություններով, այդ թվում՝ միջազգային բարձր հարթակներում։

Մեզ համար անընդունելի է նաև այն, որ Վրթանես եպիսկոպոս Աբրահամյանը, ով կոչված է պաշտպանելու իրեն հանձնված սրբություններն ու հավատավոր ժողովրդին, այդ կոչմանը հակընդդեմ գործողություններ է կատարում։ Նա, մասնավորապես, հարգանքի ու պատվի է արժանացնում Արցախն իր վանքերով, եկեղեցիներով, խաչքարերով, գերեզմաններով ու սրբավայրերով թշնամուն հանձնելու քաղաքական որոշման թիվ մեկ պատասխանատուին՝ փաստացիորեն միանալով վերջինիս հակաեկեղեցական սրբապիղծ արշավին։

Նման քայլը թե՛ իր բովանդակությամբ, թե՛ իրականացման ձևով մեր բոլորի կողմից ընկալվեց ոչ միայն խոնարհում Նիկոլ Փաշինյանի առջև, այլ նաև վերջինիս քայլերի ուղղակի արդարացում, ինչն, իհարկե, առաջացրեց Արցախի մեր ժողովրդի արդարացի զայրույթն ու վստահության կորուստը տվյալ հոգևոր առաջնորդի նկատմամբ։

Առանձնապես ցավալի է, որ մեր հավատավոր ժողովրդի բազում դիմումներին ի պատասխան՝ նա մինչ օրս ոչ միայն չի զղջացել և ներողություն չի հայտնել արցախահայությանը, այլ նույնիսկ խուսափում է սեփական հայրենակիցների ու հավատավոր հոտի հետ հանդիպումներից, չի պատասխանում հեռախոսազանգերին, ցուցաբերում է բացահայտ անհարգալից վերաբերմունք իրեն հանձնված համայնքի նկատմամբ։

Վերոգրյալի հիման վրա խնդրում ենք քննարկել Արցախի թեմի առաջնորդին փոխելու հարցը, քանզի ներկայիս առաջնորդը լիովին կորցրել է Արցախի հավատացյալ ժողովրդի վստահությունը, և իր իսկ բռնած ճանապարհի պատճառով այլևս չունի որևէ բարոյական հիմք՝ շարունակելու առաջնորդել դավաճանված Արցախի հայոց թեմը։

Խնդրում ենք Ձերդ Սրբությանն ընդառաջ գալ Արցախի Ձեր հոգևոր զավակների խնդրանքին և մեր ձայնը լսել որպես հավատավոր ժողովրդի իրական զգացմունքների արտահայտություն», - ասվում է հայտարարությունում, որի ներքո ստորագրել են «Արցախի ավագների խորհուրդ» ՀԿ,   «Վասն հայրենյաց» ՀԿ,   «Արցախ Միություն» ՀԿ,   «Արցախի օյամա կիոկուշին կարատե-դո ֆեդերացիա» ՀԿ,  «Արցախի մշակույթի և զբոսաշրջության զարգացման գործակալություն» ՀԿ,  «Վերածնվող Արցախ» ՀԿ, «Արդարություն և վերադարձ» ՀԿ,  «Ավետիս Պուլուզյան» բարեգործական ՀԿ, «Մտքի ուժ» ՀԿ, «Նախնյաց հետքերով» ՀԿ,  «Հավասար հնարավորություն» սոցիալական, երիտասարդական ՀԿ,  Արցախի «Զինվորի կողքին» ՀԿ,  «Արցախյան մշակույթի պահպանման կենտրոն» ՀԿ, «Մայրություն» ՀԿ, «Վերադարձ» կիոկուշին կարատեի ակումբ ՀԿ,  «Այսօր հանուն վաղվա» ՀԿ, «Արցախի սպորտի և երիտասարդության զարգացման կենտրոն» ՀԿ,  «Արցախի մարտարվեստների ասոցիացիա» ՀԿ,  «Արցախի խառը մենամարտերի ֆեդերացիա» ՀԿ, «Արցախի մուայթայի ֆեդերացիա» ՀԿ, իրավապաշտպան, փաստաբան Ռոման Երիցյանը, Ռուբեն Մելիքյանը՝ Արցախի 2-րդ Մարդու իրավունքների պաշտպան, Արտակ Բեգլարյանը՝ Արցախի 3-րդ Մարդու իրավունքների պաշտպան, Գեղամ Ստեփանյանը՝ Արցախի գործող Մարդու իրավունքների պաշտպան, Նարե Սիմոնյան՝ հասարակական գործիչ»։