Արդյո՞ք Հայաստանի կառավարությունը ծրագրում է առգրավել Սուրբ Էջմիածնի գույքը․ Կադաստրի կոմիտեի ղեկավարի պատասխանը

Արմինֆո.  ՀՀ կադաստրի կոմիտեի ղեկավար Սուրեն Թովմասյանը պատասխանել է հարցին, թե արդյոք ՀՀ կառավարությունը ծրագրում է առգրավել Սուրբ Էջմիածնի գույքը:

«Կառավարության օրակարգում է Հայաստանի Հանրապետությունում ընթացակարգերի խախտմամբ մասնավորեցված ողջ գույքի ուսումնասիրությունների անցկացումը: Դա դուք այսօր արդեն տեսնում եք #հատիկառհատիկ հեշթեգով գույքի վերադարձի շրջանակներում (վարչապետ Փաշինյանը պարբերաբար սոցցանցում հրապարակում է այդ հեշթեգով ՝ պատմելով ապօրինի սեփականաշնորհված գույքի մասին, որը դատարանի որոշումներով վերադարձվել է պետությանը - խմբ.)", - հոկտեմբերի 28-ին ասել է նա խորհրդարանում լրագրողների հետ զրույցում։

Նրա ասելով՝  իշխանությունները պետք է լրացնեն նախկինում թույլ տրված օրենսդրական բացը, որից հետո որոշումներ կկայացվեն յուրաքանչյուր դեպքի վերաբերյալ առանձին: Այսօր ՀԱԵ-ն տնօրինում է մոտ 600-700 միավոր անշարժ գույք, նշել է նա։

Այսօր Սուրեն Թովմասյանը նշում է, որ ԽՍՀՄ փլուզումից հետո հողի սեփականատերը եղել է բացառապես ՀՀ-ն։ «Հայաստանի կառավարությունն ու ԱԺ-ն որոշում էին, թե ինչ եղանակով բաշխել հողերը, այդ թվում ՝ Հովհաննավանքում գտնվող գույքը։ Հենց այդ որոշումներով է այդ գույքը փոխանցվել է ՀԱԵ – ին», - ասել է նա։

Ընդ որում, Կադաստրի կոմիտեի ղեկավարը «մանրամասն» չի հիշել, թե ում է ներկայումս պատկանում Հովհաննավանքի հողն ու գույքը՝ կառավարությանը, թե՞ եկեղեցուն, եւ արդյոք փոխանցումը եղել է սեփականության իրավունքով, թե՝ անհատույց օգտագործման:

Հիշեցնենք, որ վարչապետ Նիկոլ Փաշինյանը, հոկտեմբերի 22-ին ԱԺ-ում անդրադառնալով Հայ Առաքելական Եկեղեցու շուրջ կրկին բորբոքված կրքերին եւ, մասնավորապես, Հովհաննավանքի նախկին հոգեւոր հովիվ տեր Արամին, ով Գարեգին Բ-ի կողմից կարգալույծ է հռչակվել եւ այժմ պաշտոնապես աշխարհական է՝ Ստեփան Ասատրյան անունով, հայտարարել էր. «Եթե ես ճիշտ գիտեմ, Հովհաննավանքը, ինչպես բազմաթիվ այլ հուշարձաններ գտնվում են կառավարության հաշվեկշռում, եւ մի շարք եկեղեցիներ անհատույց օգտագործման են տրված ՀԱԵ-ին: Ես կարծում եմ, որ էնտեղ, որտեղ չկա հոգեւոր կյանք, այլ կան ինտրիգներ, կան խարդավանքներ, ֆեյքերեցների թե երեցֆեյքերի խմբեր են գործում, մենք կարող ենք, կա բոլոր բարոյական եւ իրավականն էլ, որ մենք այդ հուշարձանները վերադարձնենք հանրությանը եւ տեր Արամին եւ նրա նման քահանաներին բոլոր ձեւերով կաջակցենք, որ նրանք Հայաստանում վերականգնեն իրական հոգեւոր կյանքը»:

Հովհաննավանքի վերաբերյալ Փաշինյանի պնդումն ուսումնաասիրել է «Հետք» պարբերականը, որը հայտարարել է, որ այն  հիմք չունի, «այլ կերպ ասած՝ նա ճիշտ չգիտի, թե ում է պատկանում Հովհաննավանքը, բայց առանց փաստերը ստուգելու, շարունակել է թեման ու խոսել «բարոյական եւ իրավական» հիմքերով հուշարձանները Մայր Աթոռից հետ վերցնելուց»:

«Բանն այն է, որ Հովհաննավանքը, ինչպես բազմաթիվ եկեղեցիներ ու վանքեր, սեփականության իրավունքով պատկանում են Մայր Աթոռին: Ավելին՝ 2005 թ. փետրվարի 17-ին Անդրանիկ Մարգարյանի կառավարությունը որոշել էր անհատույց սեփականության իրավունքով ՀԱԵ-ին օտարել վերջինիս պատկանող վանքերի ու եկեղեցիների զբաղեցրած եւ դրանց սպասարկման համար անհրաժեշտ հողամասերը, որոնք մինչ այդ Մայր Աթոռին էին հանձնված անհատույց օգտագործման իրավունքով:

ՀԱԵ-ն այս ամենը հավաստող ապացույց ունի՝ սեփականության վկայական կամ, Փաշինյանի ասած, «կադաստրի թուղթ»: Համաձայն Կադաստրի կոմիտեից «Հետքի» ձեռք բերած տեղեկանքի՝ «Հայաստանյայց առաքելական սուրբ եկեղեցի» կրոնական կազմակերպությանն են պատկանում թե՛ Հովհաննավանքի հողամասը, թե՛ դրա վրա կառուցված շենք-շինությունները: ՀԱԵ-ի այս իրավունքը կադաստրի կողմից պետական գրանցում է ստացել ավելի քան 20 տարի առաջ՝ 2005-ի մարտի 25-ին:

Գործադիրի այս որոշմամբ Արագածոտնի մարզում Մայր Աթոռին են օտարվել վերջինիս պատկանող 21 եկեղեցիների ու վանքերի զբաղեցրած հողամասերը, որոնց ընդհանուր մակերեսը 86.770 քմ է կամ 8,67 հա: Իսկ, ընդհանուր առմամբ, 2005 թվին ՀՀ կառավարությունն անհատույց ՀԱԵ-ին է օտարել Երեւանում ու 10 մարզերում գտնվող 172 վանքերի ու եկեղեցիների հողամասերը, եւս 6-ի հողամասերի մակերեսները ենթակա էին ճշտման, ապա օտարման: 

ՀԱԵ-ն, լինելով Հովհաննավանքի եւ մյուս վանքերի ու եկեղեցիների հողի եւ շենք-շինությունների օրինական սեփականատերը, դրանց հանդեպ ունի ՀՀ սահմանադրությամբ երաշխավորված իրավունքներ», - գրում է «Հետքը», հիշեցնելով, որ ՀՀ սահմանադրության 60-րդ հոդվածն ամրագրում է. «Յուրաքանչյուր ոք ունի օրինական հիմքով ձեռք բերած սեփականությունն իր հայեցողությամբ տիրապետելու, օգտագործելու եւ տնօրինելու իրավունք»: Այսինքն՝ այն ամենը, ինչ այսօր կատարվում է կարգալույծ արված Ստեփան Ասատրյանի կողմից, նրա պաշտոնյա եւ ոչ պաշտոնյա աջակիցների մասնակցությամբ, իրականացվում է Մայր Աթոռին սեփականության իրավունքով պատկանող տարածքում»: