Հայաստանի պաշտպանության նախարարության մոտ քաշքշուկ է տեղի ունեցել անհետ կորած զինծառայողների հարազատների և ոստիկանության միջև

Արմինֆո. Այսօր՝ սեպտեմբերի 29-ին, ՀՀ պաշտպանության նախարարության մոտ քաշքշուկ է տեղի ունեցել ՊՆ մուտքը շրջափակած 2020 թվականի 44-օրյա պատերազմում գերեվարված և անհետ կորած հայ զինծառայողների հարազատների և Ռազմական ոստիկանության ու Ներքին գործերի նախարարության աշխատակիցների միջև։

Քաշքշուկի ընթացքում ծնողներից մեկի՝ Արսեն Ղուկասյանի ինքնազգացողությունը վատացել է, ինչի առնչությամբ նախարարության մոտ շտապ օգնության բրիգադ է կանչվել: Ավելի ուշ հայտնի է դարձել, որ նա սրտի հետ կապված խնդիր ունի, սակայն, չնայած դրան, Ղուկասյանը հրաժարվել է հոսպիտալացումից։ Ավելի վաղ վատացել էր նաև Ռազմական ոստիկանության պետի տեղակալ Արթուր Մշեցյանի ինքնազգացողությունը:

Պաշտպանական գերատեսչության մոտ իրավիճակը թեժացել է այն բանից հետո, երբ նախարարության մոտ հավաքվածներին հաղորդել են, որ զինված ուժերի գլխավոր շտաբի պետ Էդվարդ Ասրյանը և Արցախի Պաշտպանության բանակի նախկին հրամանատար Կամո Վարդանյանը չեն կարող հանդիպել նրանց հետ: Թեև, ինչպես նշել են ցուցարարները, հանդիպման մասին պայմանավորվածություն էր ձեռք բերվել սեպտեմբերի 27-ին պաշտպանական գերատեսչության մոտ հերթական բողոքի ակցիայի ժամանակ: Փոխարենը՝ նրանց առաջարկել են հանդիպում անցկացնել պաշտպանության փոխնախարար Արման Սարգսյանի հետ, իսկ ներս թողնել համաձայնել են միայն երկու ծնողի։ Նման պատասխանը չի բավարարել հավաքված հարազատներին, այդ առնչությամբ նրանք շրջափակել են նախարարության մուտքը։ Իրավապահները փորձել են բացել շենքի մուտքը, սկզբում լեզվակռիվ է սկսվել, որը վերածվել է քաշքշուկի։ Ստեղծված իրավիճակով պայմանավորված՝ Պաշտպանության նախարարության վարչական համալիրի դարպասների մոտ ոստիկանական ուժեր են կենտրոնացրլ։

Ինչպես լրագրողների հետ զրույցում պատմել է ծնողներից մեկը՝ Հովհաննես Պողոսյանը, արդեն հինգ տարի  իրենք տարբեր կառույցների դռներ են ծեծում, բայց ոչ ոք պատասխանատվություն չի ստանձնում, որպեսզի համալիր զբաղվի այդ հարցով:

Ծնողները նշել են, որ այսօրվա ակցիան իրենց ձգտումն է ցույց տալու, որ իրենք կան, ամեն ինչ անում են, որ իմանան իրենց հարազատների ճակատագրի մասին և կշարունակեն դա անել այնքան ժամանակ, մինչև ստանան իրենց բավարարող պատասխան: Բացի այդ, ըստ նրանց, բողոքի ակցիան կազմակերպվել է այն պատճառով, որ վերջին շրջանում պատասխանատու կառույցները դադարել են հանդիպումներ անցկացնել իրենց հետ և հաղորդել, թե այս հինգ տարիների ընթացքում ինչ կոնկրետ քայլեր են ձեռնարկվել պատանդների և անհայտ կորած զինծառայողների ճակատագիրը պարզելու համար:

Պողոսյանն ընդգծել է, որ այսօր հավաքված հարազատները չեն հավատում, թե, իբր, Հայաստանի իշխանություններն իսկապես ինչ-որ գործողություններ են ձեռնարկում: "Եթե այդ ուղղությամբ ինչ-որ աշխատանք իսկապես իրականացվեր, այսօր գոնե մեկ զինծառայողի ճակատագրի մասին կիմանայինք։ 2020 թվականից ի վեր այդ հարցի համար պատասխանատու բոլոր կառույցները մեզ նույն բանն են ասում", - լրագրողներին հաղորդել են ծնողները։

Նրանք վստահ են, որ իրենց չեն ընդունում, քանի որ կառույցներում հասկանում են, որ իրենց ոչ մի պատասխան չեն կարող տալ ։ "Նրանք շարունակելու են խուսափել մեզ հետ հանդիպելուց, քանի որ անգործության են մատնված", - կարծում են զինծառայողների հարազատները:

Այդ առնչությամբ Նրանք հաղորդել են, որ, եթե այսօր Պաշտպանության նախարարության մոտ ակցիան որևէ արդյունք չտա, ապա իրենք կփակեն բազմաթիվ ճանապարհներ և դրանով իսկ կոլապս կառաջացնեն ողջ քաղաքում:

Հիշեցնենք, որ հուլիսի 4-ին տեղի է ունեցել Հայաստանի և Ադրբեջանի անհետ կորած քաղաքացիների հարցերով զբաղվող հանձնաժողովների ներկայացուցիչների հանդիպում: Ինչպես հաղորդել է ՀՀ Ազգային անվտանգության ծառայության մամուլի կենտրոնը, քննարկման ընթացքում կողմերն անդրադարձել են հակամարտության ընթացքում անհետ կորածների ճակատագրերի պարզաբանման հետ կապված հումանիտար հարցերի: Հանդիպմանը քննարկվել են տեղեկատվության փոխանակման, ինչպես նաև որոնողական աշխատանքների կազմակերպման և համակարգման հնարավորությունները: Ավելի վաղ հաղորդվել էր, որ 1992-2023 թվականներին անհետ կորած հայերի թիվը կազմում է 1016 մարդ:

Նշենք, որ մինչ օրս հայտնի չէ ադրբեջանական բանտերում պահվող հայ ռազմագերիների և պատանդների ստույգ թիվը: Կարմիր խաչի միջազգային կոմիտեի վերջին տվյալների համաձայն, 2024 թվականի օգոստոսի դրությամբ հայկական կողմից անհետ կորած է համարվում շուրջ 1000 անձ, ընդ որում, շուրջ 300 մարդ սկսել է այդպիսին համարվել 2020 թվականի աշնանից մինչև 2023 թվականի աշուն ընկած ժամանակահատվածում Լեռնային Ղարաբաղի հակամարտության գոտում վերջին սրացումից հետո։ Ընդ որում, բոլոր տվյալները ԿԽՄԿ-ն հավաքել է անհետ կորածների հարազատների դիմումների հիման վրա։ ԿԽՄԿ-ից նաև հաղորդել են, որ այդ 300 անձանց թվում կան մի քանի տասնյակ դիմումներ, որոնք վերաբերում են այն դեպքերին, երբ ընտանիքը չի համաձայնել պետության ներկայացրած ԴՆԹ տվյալների հետ: