ԱԺ պատգամավոր. Հովիկ Աղազարյանի հետ կատարվածը վկայում է, որ խախտվել է նրա անձնական տվյալների պաշտպանության սկզբունքը

Արմինֆո. Աղազարյանի հետ կատարվածը վկայում է ոչ միայն այն մասին, որ խախտվել է նրա անձնական տվյալների պաշտպանության սկզբունքը, այլ նաև տպավորություն է, որ կառավարության աշխատակազմից ուղղորդված թիրախավորման արշավ է սկսվել պատգամավորի դեմ: Այդ մասին Facebook-ի իր էջում գրել է ԱԺ պատգամավոր Թագուհի Թովմասյանը:

«Կրկին գրություններ եմ ուղարկել իմ միջազգային գործընկերներին և մի շարք միջազգային կազմակերպությունների` Հովիկ Աղազարյանի մասով:

Որպես Մարդու իրավունքների պաշտպանությամբ զբաղվող Հայաստանի խորհրդարանի ներկայացուցիչ, իմ պարտքն եմ համարում անդրադառնալ ԱԺ պատգամավոր Հովիկ Աղազարյանի հետ կատարվածին:

Ունենալով մարդկային, գաղափարական և քաղաքական ծայրահեղ հակասություններ նույն պատգամավորի հետ, այնուամենայնիվ, համարում եմ, որ մարդու անձնական հեռախոսազրույցները, նամակագրություններն առանձնացնելը և քաղաքական թիմի անդամներին դրանց հետ ծանոթանալու հնարավորություն ընձեռնելը, անձնական տվյալների պաշտպանության տեսանկյունից, խիստ խնդրահարույց է և անընդունելի:

Այդ արտահոսքը խախտում է ազգային օրենսդրությունը և միջազգային իրավունքի մի շարք նորմեր.

1. Մարդու իրավունքների համընդհանուր հռչակագիր - 1948

2. Քաղաքացիական և քաղաքական իրավունքների մասին միջազգային դաշնագիր - 1966

3. Եվրոպական կոնվենցիա մարդու իրավունքների և հիմնարար ազատությունների պաշտպանության մասին - 1950

4. Ընդհանուր տվյալների պաշտպանության կանոնակարգ (GDPR) (2016/679) - 2016

ՀՀ Սահմանադրության 33 և 34-րդ հոդվածները հստակ սահմանում են, որ յուրաքանչյուր ոք ունի նամակագրության, հեռախոսային խոսակցությունների և հաղորդակցության այլ ձևերի ազատության և գաղտնիության իրավունք:

Առավել անընդունելի է, որ ՀՀ վարչապետի աշխատակազմի ղեկավարի տեղակալ Տարոն Չախոյանին փոխկապակցված կայքում պատգամավորի սեռական կողմնորոշման մասին «բացահայտումներ են արվել»՝ նույն հեռախոսային տեղեկությունների հղումով:

Աղազարյանի հետ կատարվածը վկայում է ոչ միայն այն մասին, որ խախտվել է նրա անձնական տվյալների պաշտպանության սկզբունքը, այլ նաև տպավորություն է, որ Կառավարության աշխատակզմից ուղղորդված թիրախավորման արշավ է սկսվել պատգամավորի դեմ:

Իմ միջազգային գործընկերներից ու տարբեր կազմակերպություններից ակնկալում եմ համապատասխան արձագանք, քանի որ նախկինում իրավունքների ամենաչնչին ոտնհարման դեպքերով օտարերկրյա դեսպանները, տեսաուղերձով, նույնիսկ դատապարտում էին տեղի ունեցածը: Հիմա՝ մի տեսակ լուռ են», - գրել է Թագուհի Թովմասյանը:

Հիշեցնենք, որ դեկտեմբերի 3-ին տեղի է ունեցել "Քաղաքացիական պայմանագիր" կուսակցության վարչության նիստը, որը վարել է վարչության նախագահ Նիկոլ Փաշինյանը: Վարչության որոշմամբ Հովիկ Աղազարյանը հեռացվել է կուսակցությունից՝ պետական և կուսակցական նշանակության գաղտնի տեղեկատվության արտահոսքի, ինչպես նաև հասարակական բարոյականության նորմերի կոպիտ խախտումների պատճառով: Այս քայլի համար հիմք է հանդիսացել Աղազարյանի հեռախոսում պահվող անձնական բնույթի տեղեկատվության արտահոսքը: Ինքը՝ պատգամավորը, հայտարարել է, որ մեծ ափսոսանքով է լքում "Քաղաքացիական պայմանագիր" խմբակցությունը՝ վայր դնելով նաև Հաշվիչ հանձնաժողովի անդամի լիազորությունները։ Պատգամավորական մանդատից Աղազարյանը մտադիր չէ հրաժարվել։