Կորպորատիվ սոցիալական պատասխանատվության շրջանակներում «Գեոթիմ» ընկերությունն արդեն ներդրել է ավելի քան 2 մլն.դոլար

Կորպորատիվ սոցիալական պատասխանատվության ծրագրերի իրականացմանը «Գեոթիմ» ընկերությունն արդեն ներդրել է մոտ 2.1 մլն.դոլար, Ամուլսարի ոսկու հանքավայրի շահագործման նախագծի շրջանակներում: Ոսկու արդյունահանումը դեռ չի սկսվել, բայց «Գեոթիմ» ընկերության կողմից ստեղծված Գեո թիմն արդեն իրականացնում է կրթության, սպորտի, մշակույթի, ենթակառուցվածքների և գյուղատնտեսության զարգացման ծրագրերն Ամուլսարին մոտ գտնվող` Գարայք, Ջերմուկ, Սարավան և Գնձեվան համայնքներում:

Այսպես, Գեո թիմի և «Վիկիմեդիա Արմենիա» կազմակերպության հետ համագործակցության շնորհիվ այդ համայնքների պատանիները 2 շաբաթ կանցկացնեն ամառային Վիկի-ճամբարում` Աղվերանում, որտեղ կծանոթանան Վիկիպեդիայի և Վիկիբառարանների խմբագրման առանձնահատկություններին: Ընկերության սոցիալական ծրագրերի գծով մենեջեր Նարա Ղազարյանը նշել է, որ Գեո թիմը մոտ 1 մլն. դոլար է ներդրել այդ ծրագրի իրականացմանը: «2007 թվականից մենք ներդրումներ ենք կատարում տարբեր կրթական ծրագրերում, դա մեր կարևորագույն նպատակներից մեկն է»,-հավելել է նա:

Գորայքում, «Բարենպաստ կյանք նոր տեխնոլոգիաների միջոցով» ծրագրի շրջանակներում ընկերությունը նախատեսում է կառուցել կաթնամթերքի արտադրության կոոպերատիվ և 600 քմ տարածքով բրոկոլիի այգի: «Սպորտի և խաղաղության դպրոց» ծրագիրը պատանիների համար նույնպես կազմակերպում է 30-օրյա ճամբար, ինտերակտիվ մարզական միջոցառումներով: Ջերմուկում նախատեսվում է վերանորոգել հրդեհ-կայանը և կազմակերպել մի քանի մշակութային միջոցառում, իսկ Սարավանում կզբաղվեն տեղի ջրամատակարարման համակարգի վերանորոգմամբ:

Ենթակառուցվածքային ծրագրերի իրականացմանն ընկերությունն, ընդհանուր առմամբ, հատկացրել է մոտ 730 000 դոլար, գյուղատնտեսության և անասնապահության զարգացմանը` 260000 դոլար, տուրիզմի և առողջապահության զարգացմանը, համապատասխանաբար` 44000 և 122000 դոլար: Կրթության, սպորտի և մշակույթի զարգացմանն ուղղվել է մոտ 630000 դոլար:

Գեոթիմ ՓԲԸ-ն հիմնադրվել է 2005թ-ին և լայնամասշտաբ երկրաբանահետախուզական աշխատանքների արդյունքում հայտնաբերել է ներկայում իր առաջնային ծրագիրը հանդիսացող Ամուլսար ոսկու հանքավայրը: Ամուլսարը նոր հայտնաբերված ոսկու հանքավայր է, վերջին 20 տարիներին առաջինը` Հայաստանում: Գեոթիմ ՓԲԸ-ի հիմնական բաժնետեր է հանդիսանում  Lydian International ընկերությունը: 
Վերակառուցման եւ Զարգացման Եվրոպական Բանկը (ՎԶԵԲ)  Լիդիան ընկերության բաժնետեր է դարձել 2009 թ. եւ աստիճանաբար մեծացնելով իր բաժնեմասը` ս.թ. մարտի 21-ին հասցրել է այն 7,5%-ի: Lydian International ընկերության խոշորագույն բաժնետերն է Համաշխարհային Բանկի Խմբի անդամ՝ Միջազգային ֆինանսական կորպորացիան (13,83% բաժնեմասով): Լիդիան ինթերնեշնլը Հայաստանում միակ հանքային ընկերությունն է, որի բաժնետերերից է ՎԶԵԲ-ը: ՎԶԵԲ-ը իր գործընկերների առաջ դնում է բնապահպանական և սոցիալական պատասխանատվության  ամենաբարձր միջազգային չափանիշներին համապատասխան գործելու պահանջ: Չափանիշները, որոնց համապատասխան իրականացվում է հուլիս-օգոստոսին հրապարակվելիք Wardell-Armstrong International- կողմից պատրաստվող Շրջակա միջավայրի և սոցիալական ազդեցության զեկույցը, համապատասխանում են ոչ միայն բնապահպանական այլև սոցիալական ազդեցության  գնահատման միջազգային բարձր չափորոշիչներին: ՎԶԵԲ ներդրումների ծավալը և պայմանները առայժմ քննարկման փուլում են և կհրապարակվեն հետագայում, ասել են ընկերությունում: