ՌԴ դեսպան. Հայ-ռուսական հարաբերությունները դառնում են ավելի լայն դիմակայության օբյեկտ, և դա չի թաքցնում հենց նույն ԱՄՆ-ը

Արմինֆո. Հայ - ռուսական հարաբերություններն այժմ ավելի լայն դիմակայության օբյեկտ են դառնում, և դա չի թաքցնում հենց նույն Միացյալ Նահանգները: Այդ մասին հայտարարել է Հայաստանում Ռուսաստանի դեսպան Սերգեյ Կոպիրկինը։

24News-ի հետ հարցազրույցում, անդրադառնալով Ռուսաստանի արտգործնախարար Սերգեյ Լավրովի այն հայտարարությունը մեկնաբանելու խնդրանքին, թե Հայաստանի ղեկավարությունը, "մտացածին պատրվակներով, խեղաթյուրելով վերջին երեք տարվա պատմությունը, գիտակցաբար գործը տանում է դեպի ՌԴ-ի հետ հարաբերությունների փլուզում", Կոպիրկինը փաստել է, որ Ռուսաստանի արտաքին քաղաքական գերատեսչության ղեկավարը գիտի, թե ինչ է ասում։ "Դրա համար այստեղ ես նախարարի խոսքերի լրացուցիչ ինչ-որ մեկնաբանություն չէի անի։ Կարծում եմ, որ այդ խոսքերը, ինչպես ես գնահատում եմ, իսկապես արտացոլում են շատ խորը մտահոգություն այն մասին, թե ինչ է կատարվում այժմ մեր հարաբերություններում, և մտահոգություն դրանց ճակատագրի համար: Քանի որ մենք հասկանում ենք, ցավոք, որ մեր հարաբերություններն այժմ ավելի լայն դիմակայության օբյեկտ են դառնում։ Ընդհանուր առմամբ, դա չի թաքցնում հենց նույն Միացյալ Նահանգները", - ասել է Կոպիրկինը։

Ռուսաստանի դեսպանի խոսքով՝ ինքը բազմիցս հիշատակել է ԱՄՆ պաշտոնական անձանց հայտարարությունները, ովքեր հրապարակային հայտարարություններում բացահայտ ասում են, որ Միացյալ Նահանգները Հայաստանի հետ հարաբերությունները դիտարկում է հենց Ռուսաստանի, Իրանի հետ առճակատման համատեքստում: "Դա շատ վատ է, դա շատ վտանգավոր է։ Դա իսկապես այն է, ինչը կարող է իրական վնաս հասցնել մեր հարաբերություններին, եթե հայկական կողմից չկա բավարար քաղաքական կամք՝ պաշտպանելու մեր հարաբերությունների այն զանգվածը, որը շատ կարեւոր է մեր ժողովուրդների, թե Հայաստանի Հանրապետության, թե հասարակ մարդկանց, հայ ընտանիքների համար", - հավելել Է Կոպիրկինը։

Ընդ որում, նա նշել է, թե որքան կարեւոր է, որպեսզի արտաքին ճնշման ներքո չկորսվի այն, ինչը միավորում է Հայաստանն ու Ռուսաստանը, կենսական նշանակություն ունի և ոչ միայն տնտեսական, այլև սոցիալական, մշակութային, հոգեբանական և, իհարկե, անվտանգության, կայունության պահպանման, տարածաշրջանի խաղաղ զարգացման հեռանկարների առումով":

 Ճշգրտող հարցին, թե արդյոք Մոսկվայում մտավախություն կա, որ "Հայաստանի արտաքին քաղաքականությունը կարող է երկիրը վերածել Ռուսաստանի եւ Արեւմուտքի միջեւ պայքարի մարտադաշտի", Կոպիրկինը խոստովանել է, որ օբյեկտիվորեն իրավիճակն այս առումով շատ մտահոգիչ է:

"Նույնիսկ այն հարցերը, որ դուք տալիս եք, խոսում են այն մասին, որ այստեղ իսկապես կա մի բան, որի մասին պետք է շատ լուրջ մտահոգվել և շատ լուրջ մտածել։ Ի դեպ, ռուսական կողմից անընդհատ ստացվում են այդ ազդակները, այդ առաջարկները, որ մենք անպայման պետք է վստահաբար, անկեղծ վարենք այդ երկխոսությունը։ Եվ այդ երկխոսությունը վարել ոչ թե հրապարակային հարթությունում, այլ հենց այնպես, որպեսզի լուծեն այն հարցերը, քննարկեն այն պահերը, որոնք փոխադարձ թյուրիմացություն են առաջացնում, որպեսզի մեր հարաբերություններն իսկապես մնան այնպիսին, ինչպիսին պետք է լինեն, քանի որ այդ հարաբերությունները բխում են մեր երկրների և մեր ժողովուրդների իսկապես խորքային շահերից", - վստահ է ռուս դիվանագետը։

Կոպիրկինը նաև շնորհակալություն է հայտնել հայ ժողովրդին մերձմոսկովյան "Կրոկուս Սիթի Հոլ" համերգասրահում տեղի ունեցած ահաբեկչությունից հետո ցուցաբերած անկեղծ կարեկցանքի համար:

"Այստեղ իսկապես կարող եմ ասել, որ ահա այս անկեղծ կարեկցանքը, ջերմությունը, որ մենք զգացինք, այնուամենայնիվ, մեզ ասում է այն մասին, հաստատում է այն, որ անկախ ամեն ինչից, այնուամենայնիվ, հայ ժողովուրդը, ռուս ժողովուրդը, նրանք իսկապես մտերիմ են, նրանց շատ բան է միավորում և, նույնիսկ, ինչ-որ իրադարձություններ, որոնք տեղի են ունենում աշխարհի քաղաքական դաշտում, բոլոր խնդիրները, մարտահրավերները, որոնց մենք բախվում ենք, միևնույն է, դա չի սպանում", - նշել է Ռուսաստանի դեսպանը, հավելելով, որ սա խոսում է այն մասին, որ այն ամենը, ինչ միավորում է երկու ժողովուրդներին, շատ խորն է։

Դիվանագետը նաև նշել է, որ նաեւ ՀՀ նախագահը եկել է դեսպանատուն, որպեսզի անձամբ ստորագրի, բացի ցավակցական հեռագրերից, որոնք ինքը, ինչպես վարչապետը, այնպես էլ արտաքին գործերի նախարարը ուղարկել են: "Դա կարևոր է ։ Դա այնքան լավ, իմ կարծիքով, և մարդկային, և քաղաքական ժեստ է", - ամփոփել է դեսպանը։