"The Future Armenian"-ի համահիմնադիր. Գուցե Սփյուռքը մեր նավթն է, բայց ամեն ինչ ապարդյուն կլինի այդ ռեսուրսի ոչ ճիշտ օգտագործման դեպքում

Արմինֆո. "The Future Armenian" շարժման համահիմնադիր, "Ավրորա" մարդասիրական նախաձեռնության համահիմնադիր Նուբար Աֆեյանը մտահոգված է Հայաստան-Սփյուռք փոխհարաբերությունների միտումներով: Այդ մասին նա հայտարարել է հունիսի 7-ին The Future Armenian վեհաժողովի նախապատրաստական աշխատանքների մեկնարկի պաշտոնական արարողության ժամանակ, որը տեղի կունենա նոյեմբերի 11-13-ը Երեւանում։

Աֆեյանը նշել է, որ միշտ լավատեսորեն է նայել Հայաստան-Սփյուռք հարաբերություններին, սակայն վերջին 1-2 տարիներին սկսել են մտահոգություններ առաջանալ ապագա փոխգործակցության վերաբերյալ:

Աշխարհի տարբեր երկրներում սփյուռքի ներկայացուցիչների հետ զրույցներում, շարունակել է Աֆեյանը, պարզվել է, որ նման զգացողություն է առաջացել ոչ միայն իր, այլեւ մի շարք հայրենակիցների մոտ:

"Նախկինում ասում էին, որ Ադրբեջանի ուժը նավթի մեջ է, իսկ Հայաստանի ուժը ՝ Սփյուռքի։ Կատակելով ասում էին, թե Սփյուռքը մեր նավթն է։ Գուցեեւ Սփյուռքը մեր նավթն է, բայց եթե մենք չկարողանանք ճիշտ օգտվել այդ ռեսուրսից, ամեն ինչ ապարդյուն կլինի", - ասել է Աֆեյանը։

Ընդ որում, բարերարն արձանագրել է, որ Հայաստանի անկախության հռչակումից հետո առաջացած խնդիրները մեծ են եւ բազմակողմանի, եւ դրանք տարիների ընթացքում չեն նվազում: "Գործող իշխանության խնդիրն այն է, որ այն աշխատում է ներկայի վրա ՝ չմտածելով ապագայի մասին։ Չկան երկարաժամկետ ծրագրեր: Իսկ Սփյուռքն աշխատում է ապագային միտված նախագծերի վրա։ Մենք ապագան տեսնում ենք որպես ներկա գործողությունների արդյունք։ Եվ եթե մենք ապագան որոշում ենք որպես նպատակ, իսկ ներկայիս գործողությունները ծառայում են այդ նպատակին, միանգամայն այլ որոշումներ կկայացվեն։ Հայաստանը մեր ներկան է, Սփյուռքը՝ ապագան, և պետք է կարողանանք որոշակի կամուրջներ հաստատել ներկայի ու ապագայի միջև։ Իմ կարծիքով ՝ դա աշխատող մոդել է", - ասել է Աֆեյանը։

Նախաձեռնության մեկ այլ համահիմնադիր՝ Ռուբեն Վարդանյանը, համոզմունք է հայտնել, որ ժամանակի ընթացքը փոխել է "մեր ժամանակի հերոսի" կերպարը ՝ առաջարկելով նոր մոտեցումներ ու նոր պահանջներ՝ առաջին պլան մղելով գիտելիքներն ու համատեղ աշխատանքը: "Քսանմեկերորդ դարում նոր փոփոխությունները նոր իրականություն են ստեղծել։ Վերջին տասնամյակների ընթացքում հաջողության են հասել տեխնոլոգիական ընկերությունները, որոնք օգտագործում են բոլորովին նոր մոտեցում: Տեխնոլոգիական աշխարհում հաճախ օգտագործվում են քովորքինգ, քոլիվինգ, համատեղ օգտոգարծում բառերը, որոնք բոլորը մեկ բանի մասին են. համագործակցություն: Վստահ եմ, որ այն, ինչ մենք սկսել ենք, հաջող կլինի։ Քանի որ մեր նախաձեռնության հիմքում համագործակցությունն է, իսկ առկա իրողություններում առանց համագործակցության հաջողության չես հասնի։ Միայն ուզում եմ իմ կողմից նշել, որ Սփյուռքը պետք է լինի ոչ թե ծավալով սահմանափակ ռեսուրս՝ նավթ, այլ, ավելի շուտ, արեւային էներգիա", - ասել է Վարդանյանը։

Միջոցառման ընթացքում ներկայացվել են խորհրդաժողովի նպատակներն ու դրա հիմքում ընկած քաղաքացիական ժողովի մոդելի առանձնահատկությունները, մասնակցության հայտերի ներկայացման գործընթացը, ինչպես նաև մայիսին Ստեփանակերտում կայացած Արցախյան ֆորումի արդյունքները:

"Հանրային քննարկումներ և Արցախյան ֆորում" պանելային քննարկման բանախոսներ Արցախի պետական նախարար Արտակ Բեգլարյանը, The Future Armenian ֆորումի մասնակից Անահիտ Մխիթարյանը, ինչպես նաև նախաձեռնության համահիմնադիրներ Արթուր Ալավերդյանը և Արամ Բեքչյանը ներկայացրել են Արցախի ֆորումի արդյունքները և մտքեր փոխանակել հանրային քննարկումների ձևաչափի և դրա արդյունքների իրականացման վերաբերյալ:

"The Future Armenian"-ը հասարակական նախաձեռնություն է, որը ստեղծվել է Հայաստանի հայերի եւ բարեկամների կողմից, որպեսզի ձեւավորվի Հայաստան պետության եւ հայ ազգի կայուն զարգացման ընդհանուր ըմբռնում: Ընթացիկ տարվա նոյեմբերի 11-13-ը Երեւանում տեղի կունենա the Future Armenian վեհաժողովը, որին նախատեսվում է Հայաստանի, Արցախի, Սփյուռքի 200 պատվիրակների մասնակցություն: Վեհաժողովում կքննարկվեն նախաձեռնության 15 նպատակները եւ այն, թե ինչպիսին պետք է լինի Հայաստանի եւ հայ ժողովրդի ապագան եւ ինչպես հասնել դրան, եւ իրենց ներդրումն ունենան հաջորդ քայլերի համատեղ պլանավորման գործում: Քննարկումը տեղի կունենա Քաղաքացիական վեհաժողովի սկզբունքով, այսինքն, ամենասովորական քաղաքացիները կներկայացնեն խնդիրների և դրանց լուծումների իրենց տեսլականը։ Պատվիրակները կընտրվեն the Future Armenian նախաձեռնության համահեղինակներից՝ պատահականության սկզբունքով: Դրա համար կարելի է գրանցվելով https://futurearmenian.com/ru / կայքում կամ զանգահարել 060700800:

108 երկրների սրտացավ հայրենակիցների աջակցությունը վայելող հիմնադրամն իր առջև դնում է հայ ժողովրդի համար կարևորագույն 15 նպատակ: Հիմնադրամը հիմնադրվել է վեց համահիմնադիրների ՝ Նուբար Աֆեյանի, Ռուբեն Վարդանյանի, Ռիչարդ Ազարնիայի, Արթուր Ալավերդյանի, Արամ Բեքչյանի, Դավիթ Թավադյանի կողմից: