ՀՀ քաղաքական ուժերը մտահոգված են պետության ղեկավարի և ԱԱԾ ու ՀՔԾ ղեկավարների միջև հեռախոսազրույցի գաղտնալսման փաստով

Արմինֆո.<Ինձ շատ է մտահոգել վարչապետի պաշտոնակատարի և ԱԱԾ ղեկավարի միջև հեռախոսազրույցի գաղտնալսման փաստը. եթե Փաշինյանի կառավարությունը չի կարող ապահովել իր հեռախոսազրույցների անվտանգությունը, ինչպես են նրանք մտադիր ապահովել երկրի անվտանգությունը>,- ԱրմԻնֆո-ի թղթակցի հետ զրույցում հարց է տվել Հանրապետական կուսակցության մամուլի քարտուղար Էդուարդ Շարմազանովը:

<Խորապես դատապարտում եմ նրանց, ովքեր գաղտնալսել և հրապարակել են այդ հեռախոսազրույցը, և գտնում եմ, որ նրանք պետք է արժանի պատիժ կրեն: Սակայն, մենք բոլորս չպետք է մոռանանք, որ մեր երկիրը մշտական հակամարտության մեջ է գտնվում Ադրբեջանի և Թուրքիայի հետ, ինչի հետ կապված՝ մեր առջև մի շարք խնդիրներ և մարտահրավերներ են ծառացած: Իսկ պետության ղեկավարը հեռախոսով քննարկում է կարևոր հարցեր՝ չմտածելով իր խոսակցության անվտանգության մասին>,- ընդգծել է Շարմազանովը:

Ըստ որում, նա նշել է, որ հեռախոսազրույցը հերքում է Փաշինյանի ավելի վաղ արած հայտարարությունը դատական համակարգի անկախության մասին: <Փաշինյանն արդեն միջամտել է օրենսդիր իշխանության աշխատանքին՝ հոկտեմբերի 2-ին օկուպացնելով խորհրդարանի շենքը և այնտեղ գտնվող պատգամավորներին: Իսկ հիմա, ինչպես ակնհայտ է դարձել գաղտնալսումից, նա միջամտում է նաև դատական համակարգի աշխատանքին: Բոլոր հայտարարությունները, թե ԱԱԾ և ՀՔԾ ղեկավարներն ընդամենը աշխատանքային հարցեր են քննարկել, առնվազն չեն համապատասխանում իրականությանը, քանի որ ԱԱԾ և ՀՔԾ ղեկավարները ոչ մի կերպ կապված չեն դատական իշխանության հետ, ինչպես և Փաշինյանը, և իրավասու չեն որոշելու դատարանի վճիռները>,- ասել է ՀՀԿ մամուլի քարտուղարը:

Արդարադատության նախարարի պաշտոնակատար, <Մենք> դաշինքից պատգամավորի թեկնածու Արտակ Զեյնալյանը հայտարարել է, որ պետք չէ չափազանց կենտրոնանալ այդ զրույցի բովանդակության վրա: <Եթե մենք մշտապես քննարկենք այդ զրույցի էությունը, նրանք, ովքեր իրականացրել են գաղնալսումը, կհասնեն իրենց նպատակին: Այդ գաղտնալսումը ոտնձգություն է հայկական պետականության նկատմամբ>,- ընդգծել է Զեյնալյանը: Պատգամավորի թեկնածուն նշել է նաև, որ ուղիղ կապ է տեսնում այդ գաղտնալսման և Քոչարյանի փաստաբանների հայտարարության միջև, որ իրենք մտադիր են հայց ներկայացնել ՄԻԵԴ: <Քոչարյանի փաստաբանները կարող են այդ ձայնագրությունն օգտագործել՝ իրենց բողոքը հիմնավորելու համար>,- նշել է Զեյնալյանը:

<Սասնա ծռեր> կուսակցության ցուցակը գլխավորող Վարուժան Ավետիսյանը նույնպես վրդովիչ է համարել այն փաստը, որ վարչապետի հեռախոսազրույցը գաղտնալսվել և տարածվել է համացանցում: <Դա մեծ վնաս է հասցնում մեր միջազգային հեղինակությանը: Ինչ վերաբերում է ձայնագրության բովանդակությանը, զերծ կմնամ մեկնաբանություններից, քանի որ դա կոռեկտ չի լինի>,- ասել է Ավետիսյանը:

ՀՅԴ-ից պատգամավորի թեկնածու Գեղամ Մանուկյանը նույնպես ցավալի և դատապարտելի երևույթ է համարել գաղտնալսման փաստը: Ըստ որում, նա վտանգավոր է համարել այն փաստը, որ պետության ղեկավարը, ԱԱԾ և ՀՔԾ ղեկավարները հեռախոսով ռազմավարական հարցեր են քննարկում: Մանուկյանն ընդգծել է, որ Փաշինյանի հայտարարությունը, որ ԱԱԾ և ՀՔԾ ղեկավարների զրույցը տեղավորվում է իրենց պաշտոնական լիազորությունների շրջանակներում, չի համապատասխանում իրականությանը: <Դատարանների գործունեությունը ոչ մի կերպ նրանց չի վերաբերում, և նրանք որևէ իրավունք չունեն գրավի չափ, խափանման միջոց որոշել>,-եզրափակել է Մանուկյանը:

<Բարգավաճ Հայաստանից> պատգամավորի թեկնածու Նաիրա Զոհրաբյանն իր հերթին հայտարարել է, որ այստեղ վտանգի տակ է երկրի անվտանգությունը և միջազգային հեղինակության հարցը: <Գտնում եմ, որ գաղտնալսում իրականացնողները պետք է պատժվեն, ովքեր էլ որ լինեն: Չէ որ վարչապետի, ԱԱԾ և ՀՔԾ ղեկավարների հեռախոսազրույցը գաղտնալսելու համար անհրաժեշտ է թանկարժեք սարքավորում ունենալ: Ինչ վերաբերում է խոսակցության բովանդակությանը, վարչապետն արդեն ամեն բան պարզաբանել է, ավելացնելու բան չունեմ >,- ասել է Զոհրաբյանը:

<Իմ քայլը> դաշինքի մամուլի քարտուղար Վահան Կոստանյանը նույնպես հայտարարել է, որ ավելացնելու բան չունի դաշինքի առաջնորդ Փաշինյանի խոսքերին: Փաշինյանը գաղտնալսված ձայնագրության հրապարակումից հետո հավաստիացրել է, որ խոսակցությունն ամբողջովին մոնտաժված է: Նրա կարծիքով, ԱԱԾ և ՀՔԾ ղեկավարների գործողությունները միանշանակ տեղավորվում են իրենց պաշտոնական լիազորությունների շրջանակներում: <Կասկած չկա, որ այդ գաղնալսումը հակահեղափոխության դրսոևորում է, կասկած չկա, որ հակահեղափոխական ուժերին և կոռուպցիոներների ջախջախիչ պարտություն է սպասվում>,- հայտարարել է Փաշինյանը: