Ավերիչ երկրաշարժից երեսուն տարի անց՝ բնակարանամուտ Գյումրիում

Արմինֆո.Գյումրեցի Հովհաննիսյանների ընտանիքը, 1988թ.-ի ավերիչ երկրաշարժից հետո, երեք տասնամյակ ապրել է փայտյա ինքնաշեն կացարանում: Բազմանդամ ընտանիքի հայրը՝ Մարտինը, համերկրացիներից շատերի նման, փորձել է ինչ-որ  լուծում գտնել, երբ զգացել է, որ ժամանակավոր կացարանից դուրս գալու նպատակը հեռու է իրականություն դառնալուց:

Խոնավությունից քայքայված կացարանին ամեն կերպ տան տեսք տալու նրա փորձերը, սակայն, ձախողվել են: Իսկ նոր տուն կառուցել չի հաջողվել՝ սոցիալական պայմանների պատճառով:  Երեք տասնամյակ է պահանջվել՝ միայն պատերն ու տանիքը կառուցելու համար: Ժամանակավորից երկարաժամկետ բնակավայրի վերածված փայտե կացարանը մնացել է ընտրության միակ հնարավորությունը:

Ընթացիկ տարվա գարունն ավետաբեր է եղել Հովհաննիսյանների համար. ընտանիքին ընդգրկվել է գործընկեր կառույցների՝ ՎիվաՍել-ՄՏՍ-ի և Հայաստանի «Ֆուլեր տնաշինական կենտրոնի» կողմից իրականացվող բնակարանաշինության ծրագրում: Կամավորության սկզբունքով համախմբված թիմերը Մարատի հետ շինարարություն են սկսել՝ նրա երազանքն իրականություն դարձնելով: Նոր և կոմունալ բոլոր պայմաններով ապահովված բնակարանում հյուրընկալվել են աջակցող կազմակերպությունների ղեկավարները:

«Տարիներ շարունակ աշխատել եմ ընտանիքիս համար նորմալ պայմաններ ստեղծել, սակայն չեմ հաջողել: Փորձել ել եմ տան տեսք տալ փայտյա ինքնաշեն տնակին, բայց միևնույն է՝ այն մնացել է ցուրտ ու խոնավությունից փտած հատակով ժամանակավոր կացարան: Տասնամյակներ են անցել, երեխաներս արդեն իրենց ընտանիքն են ստեղծել, սակայն գրեթե ոչինչ չի փոխվել: Դժվարություններից երբեք չեմ վախեցել, բայց վախենում էի, որ որդիներս պանդխտության ուղին կբռնեն, ու տունս կքանդվի՝ դեռ չսարքված:  Ձեր օգնությամբ այսօր ոչ միայն տունս կառուցվեց, այլև՝ ընտանիքս համախմբվեց: Անչափ շնորհակալ եմ»,- ասել է ընտանիքի հայրը՝ Մարտինը:

«Ցանկացած գործում, յուրաքանչյուրը պետք է ունենա հենման կետ։ Մեկի համար դա կարող է լինել հույսը, մյուսի համար՝ վճռականությունը, երրորդի համար՝ կամքը։ Կարևոր չէ, թե երազանքների իրականացման ճանապարհին ով ինչ կընտրի։ Կարևորը դրանցից մեկի առկայությունն է՝ սկսած գործում։ Մեզ համար, իբրև կազմակերպություն, կարևոր է մեր հայրենակիցների համար այդ հենման կետն ապահովելը։ Ուրախությամբ եմ արձանագրում, որ ևս մեկ ընտանիք, մեր գործակցության արդյունքում, հաղթահարեց տարիների խնդիրն ու լուսավոր ժպիտով կարող է նայել ապագային»,- ասել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:

«Ցավալի է, որ երկրաշարժից երեսուն տարի անց դեռ բնակարանային խնդիրներ կան: Այստեղ ապրող մարդիկ, հիրավի, հայրենի հողը չլքելու վճռականությամբ լցված, տոկունության և ուժի իսկական օրինակ են: Տարիների դժվարությունները հաղթահարած, սակայն լավատեսությամբ լեցուն այս ընտանիքի հետ բնակարանամուտի ուրախությունը կիսելը իսկական երջանկություն է»,- ասել է «Ֆուլեր տնաշինական կենտրոնի›› նախագահ Աշոտ Եղիազարյանը:

Հովհաննիսյաններն արդեն չեն անհանգստանում տեղանքին հատուկ՝ ցրտաշունչ ձմռան հեռանկարից: Ավելին, կա տարեմուտը նոր բնակարանում նշելու անհամբեր սպասում:

ՎիվաՍել-ՄՏՍ-ը («ՄՏՍ Հայաստան» ՓԲԸ) Հայաստանում հեռահաղորդակցության առաջատար օպերատորն է, որն ունի ամենահզոր 2G/3.75G/4G ցանցը և տրամադրում է ձայնային և տվյալների փոխանցման ծառայությունների բազմազան տեսականի` Հայաստանի ամբողջ տարածքում: Գործունեության հիմք ընդունելով իր բաժանորդների շահերին լավագույնս ծառայելը, հիմնադրման օրվանից` 2005թ. հուլիսի 1-ից, ՎիվաՍել-ՄՏՍ-ը կարճ ժամանակամիջոցում կարողացել է ստեղծել համահանրապետական ցանց և բաժանորդների մեծ բազա: ՎիվաՍել-ՄՏՍ-ը նորարարությունների առաջատարն է և հետամուտ է ոլորտի բոլոր զարգացումներին` ի շահ երկրի շարժական հեռահաղորդակցության շուկայի: ՎիվաՍել-ՄՏՍ-ն իր գործունեության մեջ առաջնորդվում է ISO 26000 (Սոցիալական պատասխանատվության միջազգային ստանդարտ) և ISO/IEC 27001:2013 (Տեղեկատվական անվտանգության կառավարման համակարգ) ստանդարտներով: Հավելյալ տեղեկություններ ստանալու համար այցելեք www.mts.am

«Մոբիլնիյե Տելեսիստեմի» ՀԲԸ-ն (ՄՏՍ) հեռահաղորդակցության խոշորագույն օպերատոր է Ռուսաստանում և ԱՊՀ երկրներում: Դուստր ձեռնարկությունների հետ միասին կազմակերպությունը սպասարկում է ավելի քան 100 միլիոն բաժանորդի Ռուսաստանում, Հայաստանում, Բելառուսում, Ուկրաինայում և Թուրքմենստանում: 2000թ-ից «ՄՏՍ»-ի բաժնետոմսերը գնանշված են Նյու Յորքի բորսայում MBT ծածկագրի տակ: Հավելյալ տեղեկություններ ստանալու համար այցելեք www.mtsgsm.com

Հայաստանի «Ֆուլեր Տնաշինական Կենտրոնը¦ բարեգործական հասարակական կազմակերպություն է, որն աջակցում է Հայաստանի և Արցախի հանրապետություններում ցածր եկամուտ ունեցող ընտանիքներին կառուցել և վերանորոգել պարզ, հարմարավետ և մատչելի տներ՝ տալով նրանց երկարաժամկետ, անտոկոս փոխառություններ, ինչպես նաև իրականացնում է տնազուրկների շահերի պաշտպանություն՝ դարձնելով այն խղճի հարց և գործելու մղում։ Ամենամսյա  ետվճարներից կազմվում է շրջանառու  ֆոնդ և օգտագործվում այլ ընտանիքներին աջակցելու նպատակով՝ այսպիսով դառնալով համայնքային զարգացման կայուն ֆինանսական հիմք։ Առ այսօր կազմակերպությունն աջակցել է  մոտ 700  ընտանիքների:

Լրացուցիչ  տեղեկությունների  համար կարող եք այցելել՝ www.fcharmenia.org կամ գրել [email protected] էլ հասցեին: