Նալբանդյան. Հայաստանը ՄԱԿ և ԵԱՀԿ առաջին երկրներից էր, որ բարձրացրեց կրոնական և էթնիկ խմբերի պաշտպանության խնդիրը

Արմինֆո. «Քրիստոնյաների և կրոնական այլ խմբերի դեմ ատելության հիման վրա հանցագործությունների կանխարգելում և դիմագրավում. հեռանկարներ ԵԱՀԿ-ից և անդին» համաժողովի կարևորությունը Հայաստանի համար պայմանավորված է մի շարք հանգամանքներով: Այդ մասին համաժողովի բացմանը հայտարարել է ՀՀ արտգործնախարար Էդվարդ Նալբանդյանը:

«Առաջինը. պատմականորեն գտնվելով տարբեր քաղաքակրթությունների խաչմերուկում՝ Հայաստանը ձևավորել է համակեցության և այլ մշակույթների ու կրոնների նկատմամբ հարգանքի խորը արմատներ ունեցող ավանդույթներ: Լինելով քրիստոնեությունը որպես պետական կրոն ընդունած առաջին երկիր՝ հայերը կանգնած են քրիստոնեական քաղաքակրթության ձևավորման ակունքներում: Մենք մշտապես ամուր կապեր ենք ունեցել մուսուլմանական և այլ ժողովուրդների ու երկրների հետ: Որպես աշխարհի հարյուրավոր երկրներում համայնքներ ունեցող ժողովուրդ՝ հայերն անմիջականորեն գիտեն ինչպես հանդուրժողականության արժեքը, այնպես էլ խտրականությամբ ու այլատյացությամբ պայմանավորված խնդիրները: Այս համաժողովի անցկացումը Երևանում հնարավորություն է ընձեռում ներկայացնելու մեր ժողովրդի փորձառությունը։

Երկրորդ, սեփական հայրենիքում օտար տիրապետության տակ պատմականորեն ենթարկվելով հալածանքների՝ ներառյալ կրոնական հողի վրա, ինքնիշխան պետությունների ընտանիքին միանալուց հետո հայերը չէին կարող աչք փակել նրանց տառապանքների վրա, ովքեր շարունակում են ենթարկվել կրոնական խտրականության և ատելության հանցագործությունների թիրախ հանդիսանալ:

Մենք ակտիվորեն նպաստում ենք միջազգային ջանքերին՝ ուղղված ինքնությամբ պայմանավորված խտրականության և բռնության կանխարգելմանը:

Այս առումով մեր ձեռնարկված վերջին նախաձեռնություններից էին 2015թ.-ին ՄԱԿ-ի Մարդու իրավունքների խորհրդում Ցեղասպանության կանխարգելման վերաբերյալ և ՄԱԿ-ի Գլխավոր ասամբլեայում Ցեղասպանության զոհերի հիշատակի միջազգային օրվա վերաբերյալ բանաձևերի ընդունումը: Այս ջանքերը շարունակվելու են:

Ատելության քարոզին, անհանդուրժողականությանը և այլատյացությանը դիմագրավելը Եվրոպայի խորհրդում Հայաստանի 2013թ.-ի նախագահության հիմնական առաջնահերթություններից էին: Այն ժամանակ երբ գլուխ էին բարձրացնում ԴԱԵՇ-ը և այլ ահաբեկչական խմբավորումները՝ Հայաստանը ՄԱԿ և ԵԱՀԿ առաջին երկրներից էր, որ բարձրացրեց կրոնական և էթնիկ խմբերի պաշտպանության խնդիրը և հետևողաբար հանդես եկավ այս առնչությամբ միջազգային պարտավորություններն ամրապնդելու օգտին:

Երրորդ, Հայաստանում այս համաժողովի հյուրընկալումը հերթական քայլն է վտանգի տակ գտնվող կրոնական խմբերի խնդիրների վերաբերյալ իրազեկվածության բարձրացմանն ուղղված մեր ջանքերում: Հիշատակեմ 2015թ. և 2017թ. Ժնևում՝ ՄԱԿ-ի Մարդու իրավունքների խորհրդի շրջանակներում տեղի ունեցած բարձր մակարդակի երկու միջոցառումներ՝ «Աջակցություն քրիստոնյաների իրավունքներին, մասնավորապես, Մերձավոր Արևելքումե և «Փոխադարձ հարգանքը և խաղաղ համակեցությունը՝ որպես միջկրոնական խաղաղության և կայունության պայման. աջակցելով քրիստոնյաներին և այլ համայնքներինե, որոնք կազմակերպվել էին Հայաստանի, Ռուսաստանի, Սուրբ Աթոռի և Լիբանանի կողմից՝ այլ գործընկեր երկրների հետ համատեղ:

Մենք նաև աջակցել ենք նախաձեռնություններին՝ ուղղված Մերձավոր Արևելքում կրոնական և էթնիկ խմբերի պաշտպանության խնդրի բարձրաձայնմանը:

Հայաստանն իր ներդրումն է ունեցել 2015թ. Փարիզում կայացած Մերձավոր Արևելքում էթնիկ և կրոնական բռնությունների զոհերին նվիրված միջազգային համաժողովին, ինչպես նաև այս տարվա հունիսին Մադրիդում կայացած էթնիկ և կրոնական բռնության զոհերին նվիրված համաժողովին:

Հայաստանի ուշադրության կենտրոնում է եղել նաև Մերձավոր Արևելքի խոցելի խմբերի փախստականների և գաղթականների իրավիճակը, որը բարձրաձայնվել է վերջերս կայացած այնպիսի միջազգային միջոցառումների ընթացքում, ինչպիսիք էին 2016թ. ՄԱԿ՝ փախստականների և միգրանտների լայնածավալ տեղաշարժերի հիմնախնդիրներին նվիրված գագաթաժողովը, 2016թ. Փախստականների հարցերով Առաջնորդների գագաթաժողովը, ԵԱՀԿ 2017թ. համաժողովը՝ նվիրված Միջերկրածովյան տարածաշրջանում փախստականների և միգրանտների լայնածավալ հոսքերին»,- ասել է Նալբանդյանը: