Մամեդյարովը կրկին խոսել է սուբստանտիվ բանակցությունների մասին

Արմինֆո. Ադրբեջանի ԱԳՆ ղեկավար Էլմար Մամեդյարովն անդրադարձել է ղարաբաղյան հակամարտության կարգավորման 6 կետերի վերաբերյալ  ԵԱՀԿ Մինսկի խմբի ամերիկացի համանախագահ Ռիչարդ Հոգլանդի հայտարարության առնչությամբ իր հայ գործընկեր Էդվարդ Նալբանդյանի արձագանքին:

Մամեդյարովը, մասնավորապես, նշել է, որ ԵԱՀԿ Մինսկի խմբի համանախագահող երկրների Ակվիլի, Մուսկոկի և Լոս-Կաբոսի հայտարարույթյուններում արտացոլված են հակամարտության փուլային կարգավորման հիմնական տարրերը՝ Հելսինկյան եզրափակիչ ակտի հիման վրա:

«Եվ այդ տարրերը կազմում են նորացված Մադրիդյան սկզբունքների հիմքը: Այդ սկզբունքները ևս մեկ անգամ ընդգծել է ԱՄՆ-ից համանախագահ Ռիչարդ Հոգլանդը:

Միաժամանակ Մամեդյարովը նշել է, որ որ եթե հայկական կողմն ընդունում է, որ այդ սկզբունքները նոր չեն, այդ դեպքում արդեն անհրաժեշտ է սուբստանտիվ բանակցություններ սկսել՝ մանրամասների քննարկման նպատակով: «Ադրբեջանական կողմը բազմիցս հայտնել է ստատուս-քվոյի փոփոխության շուրջ լուրջ բանակցություններ սկսելու, հակամարտության շուտափույթ կարգավորման և տարածաշրջանում կայուն խաղաղության ապահովման իր պատրաստակամությունը»,- ասել է Մամեդյարովը:

Նշենք, որ ՀՀ ԱԳՆ ղեկավար Էդվարդ Նալբանդյանը, մեկնաբանելով Հոգլանդի հայտարարությունը, նշել էր, որ ամերիկացի համանախագահը ղարաբաղյան հակամարտության կարգավորման վերաբերյալ որևէ նոր բան չի ասել: «Ամերիկացի միջնորդը որևէ նոր բան չի ասել, նա ասել է այն, ինչի մասին խոսել են համանախագահող երկրները: Եթե նայեք միջնորդ երկրների հինգ հայտարարություններին, ապա այդ կետերի մասով որևէ նոր բան չի ասվել: Հայաստանն արդեն իր վերաբերմունքը հայտնել է այդ հինգ հայտարարությունների առնչությամբ: Այլ բան է, որ Ադրբեջանը խուսափում է ինչ-որ կերպ հրապարակել իր դիրքորշումն այդ ձևակերպումների վերաբերյալ: Ավելին, ոչ միայն խուսափում է, այլև ձևացնում, որ այդպիսի որևէ առաջարկ, սկզբունք կամ տարր գոյություն չունի»,- լրագրողներին հայտարարել էր Նալբանդյանը:

Նշենք, որ ԵԱՀԿ Մինսկի խմբի ամերիկացի համանախագահ Ռիչարդ Հոգլանդը /նրա փոխարեն կնշանակվի Միջազգային կազմակերպություններում Միացյալ Նահանգների առաքելության գործերի ժամանակավոր հավատարմատար Էնդրյու Շեֆերը- խմբ./ հրապարակել է Լեռնային Ղարաբաղի հակամարտության կարգավորման հիմնական կետերը:

«Հաշվի առնելով Լեռնային Ղարաբաղի բարդ պատմությունը, կողմերը պետք է սահմանեն դրա վերջնական իրավական կարգավիճակը ապագայում՝ փոխադարձ համաձայնությամբ եւ իրավական պարտավորեցնող կամարտահայտմամբ:

 Նախկին Լեռնային Ղարաբաղի ինքնավար մարզի սահմանների մեջ գտնվող տարածքին, որը Բաքվի կողմից չի վերահսկվում, պետք է ժամանակավոր կարգավիճակ տրվի, որն առնվազն ապահովում է անվտանգության եւ ինքնավարության երաշխիքներ։

Լեռնային Ղարաբաղի շուրջ գրավված տարածքները պետք է հանձնվի Ադրբեջանի վերահսկողությանը։ Այնտեղ չի կարող լինել որեւէ բնակեցում՝ առանց հաշվի առնելու Ադրբեջանի ինքնիշխանությունը։ Այդ տարածքների նկատմամբ Ադրբեջանի ինքնիշխանությունը պետք է վերականգնվի:

Պետք է լինի միջանցք, որը կմիացնի Հայաստանը Լեռնային Ղարաբաղի հետ: Այն պետք է լինի բավականաչափ լայն՝ անվտանգ փոխադրումների ապահովման համար։ Սակայն այն չի կարող ներառել Լաչինի ամբողջ շրջանը:

Հարատեւ կարգավորումը պետք է ճանաչի բոլոր տեղահանված անձանց եւ փախստականների իրավունքը՝ վերադառնալ բնակության նախկին վայր:

Կարգավորումը պետք է իր մեջ ներառի անվտանգության միջազգային երաշխիքներ, որոնք կներառեն խաղաղարար միջոցառումներ: Գոյություն չունի սցենար, որում խաղաղությունը կարող է ապահովված լինել առանց լավ նախապատրաստված խաղաղ գործողությունների, որոնք վայելում են բոլոր կողմերի վստահությունըե,- նշել է համանախագահը: