


Արմինֆո. Գերմանիան, Ուկրաինան, Միացյալ Թագավորությունը, Իսպանիան և ևս 35 եվրոպական երկրներ հինգշաբթի՝ նոյեմբերի 12-ին, Դուբլինում կայացած Եվրոպական քաղաքական համայնքի գագաթնաժողովում համաձայնեցրել են Եվրոպայի անվտանգության "առանցքային սկզբունքները" և դրանք ամրագրել "խարտիայում": Նախաձեռնության հեղինակը Ֆրանսիան է։ Ըստ մի շարք լրատվամիջոցների՝ Հայաստանը չի միացել "խարտիային"։ Պաշտոնական Երևանը Դուբլինում ներկայացված էր վարչապետ Նիկոլ Փաշինյանի մակարդակով:
Ինչպես հաղորդում է Deutsche Welle-ն ՝ վկայակոչելով AFP-ն, փաստաթուղթն ամրագրում է առկա դրույթները, որոնք ընկած են եվրոպական անվտանգության հիմքում, և դրանք լրացնում է նոր թեմաներով, մասնավորապես, որոնք ընդգրկում են հիբրիդային սպառնալիքներ։ Այսպես, ստորագրողները "ամենավճռական ձևով " դատապարտել են Մոսկվայի "ուժեղացված հիբրիդային արշավները" և մտադրություն են հայտնել դիմակայել այդ սպառնալիքներին և պայքարել տեղեկատվական միջամտության դեմ։
"Խարտիայում" ընդգրկված են նաեւ այնպիսի թեմաներ, ինչպես պայքարն ահաբեկչության, թմրանյութերի վաճառքի եւ միգրանտների ապօրինի ներմուծման դեմ:
Մասնակից երկրները հայտարարել են, որ "եվրոպական երկրները մեծ պատասխանատվություն են ստանձնում Եվրոպայում անվտանգության համար", ինչը" դրականորեն կանդրադառնա գլոբալ և անդրատլանտյան անվտանգության վրա": Լրագրողների տեղեկություններով, որոնց հաջողվել է ծանոթանալ "խարտիայի" տեքստին, այն հիմնվում է ՄԱԿ-ի կանոնադրության, ինչպես նաեւ ՆԱՏՕ-ի մասին Հյուսիսատլանտյան պայմանագրի եւ Եվրամիության մասին պայմանագրի վրա:
Միացյալ Թագավորության վարչապետ Էնդի Բյորնեմը կարևորել է այն, որ "խարտիայում" հիշատակվում է ՆԱՏՕ-ն. չէ որ, նրա խոսքով, դաշինքին անհրաժեշտ կլինի "կայուն իրավիճակ ապահովել" Եվրոպայում՝ Ուկրաինայի պատերազմից հետո: "Խարտիայի" նախագծում ասվում է, որ "եվրոպական անվտանգությանը վերաբերող ցանկացած հարց պետք է լուծվի եվրոպացիների հետ միասին", գրում է AFP-ն:


