«Ուժեղ Հայաստան»-ը Երևանում ԵՄ գրասենյակի դիմաց բողոքի ակցիա է անցկացրել․ նրանք պահանջում են արձագանքել կալանքի տակ ընդդիմադիր գործչի մահվանը

ԱրմԻնֆո.  «Ուժեղ Հայաստան» խմբակցության պատգամավորները, նրանց համախոհներն ու աջակիցները բողոքի ակցիա են անցկացրել Երևանում Եվրոպական միության (ԵՄ) ներկայացուցչության առջև՝ կապված քաղաքական ուժի կողմից Ստեփանավանի ղեկավարի պաշտոնի թեկնածու Արսեն Գևորգյանի՝ «Նուբարաշեն» քրեակատարողական հիմնարկում մահվան հետ։

Լրագրողների հետ զրույցում «Ուժեղ Հայաստան» խորհրդարանական խմբակցության պատգամավոր Արեգա Հովսեփյանը նշել է, որ ակցիայի մասնակիցները ԵՄ-ին կոչ են անում արձագանքել Հայաստանում տեղի ունեցող իրադարձություններին, մասնավորապես՝ ժողովրդավարական սկզբունքներից նահանջի և քաղաքական հետապնդումների ուժեղացման գործընթացին։ «Կրկին ականատես դարձանք ընդդիմադիր գործչի՝ կալանքի տակ գտնվելու ընթացքում մահվանը։ Գևորգյանն այնտեղ էր գտնվում իր ընդդիմադիր հայացքների պատճառով։ Մենք պահանջում ենք դադարեցնել քաղաքական պատկանելության հիմքով քրեական հետապնդումը։ Կալանավորումը դարձել է այս իշխանության ձեռքում մահակ։ 2018 թվականից ի վեր երկրում երեք անգամ ավելացել են կալանավորման միջնորդությունները, և դրանց մեծ մասը բավարարվում է», - ուշադրություն է հրավիրել Հովսեփյանը։

Իր հերթին «Ուժեղ Հայաստան» խմբակցության պատգամավոր Մարիաննա Ղահրամանյանը պարզաբանել է, որ ակցիայի գլխավոր նպատակն է ակցիայի մասնակիցների պահանջները հասցնել Երևանում ԵՄ ներկայացուցչությանը, անձամբ ԵՄ դեսպան Վասիլիս Մարագոսին, ինչպես նաև մարդու իրավունքների պաշտպանությամբ զբաղվող այլ կառույցներին։ «Մենք այստեղ ենք՝ ցույց տալու, որ այսօր Հայաստանում առկա է ժողովրդավարության և մարդու իրավունքների պաշտպանության ճգնաժամ, իսկ քաղաքական հետապնդումները հասել են այն աստիճանի, որ հանգեցնում են ողբերգական հետևանքների», - նշել է Ղահրամանյանը։

Նա հայտնել է, որ խմբակցության անունից փոխանցում են նամակ, որում իրավիճակին տրված է օբյեկտիվ գնահատական։ «Մենք կարծում ենք, որ եվրոպական կառույցներն այլևս չեն կարող անտարբեր մնալ Հայաստանում տեղի ունեցող իրադարձությունների նկատմամբ։ Ավելի վաղ Գևորկյանի փաստաբանական խումբը հայտարարություն էր տարածել, որում հաղորդվում էր, որ ինքնազգացողության վատացման վերաբերյալ բողոքներից հետո նրա մոտ մոտեցել է ոչ թե բանտի բժիշկը, այլ անհրաժեշտ պատրաստվածություն չունեցող բուժքույրը։ Այս հանգամանքը պետք է արձանագրվի։ Եթե ամեն ինչ պատշաճ կերպով արվեր, հնարավոր է՝ ողբերգությունը հնարավոր լիներ կանխել։ Տեղի ունեցածի պատասխանատվությունը կրում է երկրի քաղաքական ղեկավարությունը, մասնավորապես՝ վարչապետ Նիկոլ Փաշինյանը, ինչպես նաև արդարադատության նախարար Սրբուհի Գալյանը, գլխավոր դատախազ Աննա Վարդապետյանը, դատավոր Արմեն Գրիգորյանը», - հավելել է պատգամավորը։

Բացի այդ, նա պատմել է, որ ակցիայի ընթացքում Հայաստանի Ազգային ժողովի եվրոպական ինտեգրման հարցերի մշտական հանձնաժողովի նախագահ Հարություն Հարությունյանը կապ է հաստատել ԵՄ դեսպանի հետ։ Զրույցի ընթացքում նա դեսպանին ներկայացրել է ակցիայի անցկացման պատճառներն ու եվրոպական կառույցին ուղղված իրենց պահանջները։

Ավելի վաղ կուսակցության հաղորդակցության և հասարակայնության հետ կապերի ղեկավար Նելլի Ավետիսյանը ԱրմԻնֆոյին հաստատել էր, որ Արսեն Գևորգյանը մահացել է քննչական մեկուսարանում։  Նախնական տեղեկությունների համաձայն՝ նրա մոտ սրտամկանի ինֆարկտ է տեղի ունեցել։ ՔԿՀ-ում հայտնել են, որ Գևորգյանի ինքնազգացողությունը վատացել է առավոտյան ժամը 07.55-ին, իսկ արդեն ժամը 08:30-ին բժիշկներն արձանագրել են նրա մահը։ Իշխանությունները հավաստիացրել են, որ ավելի վաղ Գևորգյանը առողջական խնդիրներից չէր դժգոհել։  Ընդդիմադիր գործչի մահվան փաստի առթիվ քրեական գործ է հարուցվել։ Իշխանական ուժում, արձագանքելով Գևորգյանի մահվանը, միայն հայտարարել են, թե տեղի ունեցածում արտառոց ոչինչ չկա, և որ օրական առնվազն 4 մարդ մահանում է ինֆարկտից։ Հայաստանի ընդդիմությունն իր հերթին Գևորգյանի մահվան ողջ պատասխանատվությունը դրել է Նիկոլ Փաշինյանի գլխավորած իշխանության վրա։

Հիշեցնենք, որ հոկտեմբերի 21-ին Հայաստանի Հակակոռուպցիոն կոմիտեն քրեական գործ է հարուցել Ստեփանավանի ավագանու ընտրություններում «Ուժեղ Հայաստան» կուսակցության համամասնական ցուցակը գլխավորած Արսեն Գևորգյանի և ևս 13 անձանց դեմ։ Ավելի ուշ հայտնի դարձավ, որ դատարանի որոշմամբ Գևորգյանը երկու ամիս ժամկետով կալանավորվել է։ Եվս 5 անձի նկատմամբ որպես խափանման միջոց է ընտրվել երկամսյա կալանքը կամ տնային կալանքը։ Հատկանշական է, որ նշված իրադարձություններից մեկ օր առաջ Հայաստանի վարչապետ Նիկոլ Փաշինյանը առաջարկում էր անձամբ իրեն գրել այն քաղաքացիներին և համայնքի ղեկավարի թեկնածուներին, ովքեր ՏԻՄ ընտրություններում իշխանական «Քաղաքացիական պայմանագիր» ուժի կողմից ճնշումների են ենթարկվում։ Սակայն նույն օրվա երեկոյան նա ինքն սկսեց սպառնալ ընդդիմադիր ուժերի ներկայացուցիչներին։ Նշենք, որ այս ամենը տեղի ունեցավ Ստեփանավանում տեղական ինքնակառավարման մարմինների ընտրություններից առաջ։