
Արմինֆո.Նոյեմբերի 10-ին Երևանում տեղի է ունենում ԱՊՀ երկրների արդարադատության նախարարների խորհրդի նիստը: Այս տարի Խորհրդում նախագահում է Հայաստանը:
ՀՀ արդարադատության նախարար Սրբուհի Գալյանը «Դվին» հյուրանոցում ողջունում է գագաթնաժողովին մասնակցող պատվիրակությունների ղեկավարներին, այդ թվում՝ Ռուսաստանի արդարադատության նախարար Կոնստանտին Չույչենկոյին: Նիստն ինքնին տեղի կունենա փակ դռների ետևում: Ավարտից հետո Սրբուհի Գալյանը կամփոփի Խորհրդի աշխատանքը և կպատասխանի լրագրողների հարցերին:
ՀՀ կառավարությունը նախկինում 11,1 միլիոն դրամ էր հատկացրել գագաթնաժողովի կազմակերպման և անցկացման համար: Որոշման նախագծի հիմնավորման մեջ նշվում էր, որ ՀՀ արդարադատության նախարարության և ԱՊՀ անդամ պետությունների իրավասու արդարադատության մարմինների միջև տարիներ շարունակ հաստատվել և պահպանվել է սերտ և փոխշահավետ համագործակցություն՝ ուղղված արդարադատության ոլորտում փորձի փոխանակմանը, մասնագիտական երկխոսության խորացմանը և փոխադարձ հետաքրքրություն ներկայացնող ոլորտներում համագործակցության զարգացմանը: Համագործակցության ամենակարևոր հարթակներից մեկը ԱՊՀ անդամ պետությունների արդարադատության նախարարների խորհուրդն է, որի գործունեությունը նպատակաուղղված է անդամ պետությունների միջև արդարադատության ոլորտում համագործակցության առաջնահերթությունների քննարկմանը, համատեղ նախաձեռնությունների և միջոցառումների բացահայտմանը, ինչպես նաև արդիական իրավական և ինստիտուցիոնալ հարցերի վերաբերյալ դիրքորոշումների և փորձի փոխանակմանը: Իր նիստերի ընթացքում Խորհուրդը քննարկում է ԱՊՀ անդամ պետություններում արդարադատության ոլորտի թվայնացմանը, մարդու իրավունքների պաշտպանությանը, կոռուպցիայի դեմ պայքարի քաղաքականությանը, փոխադարձ իրավական օգնությանը և այլ ոլորտներին վերաբերող արդիական հարցեր:
Խորհուրդը ստեղծվել է ԱՊՀ անդամ պետությունների ղեկավարների 2005 թվականի օգոստոսի 26-ի որոշմամբ: Խորհրդի 19-րդ նստաշրջանը տեղի է ունեցել 2025 թվականի հունիսի 25-ին Մինսկում, իսկ աշխատանքի արդյունքում ընդունված որոշմամբ՝ Խորհրդի 2026 թվականի նախագահությունը փոխանցվել է Հայաստանի Հանրապետությանը: Այս առումով, Խորհրդի 20-րդ նստաշրջանը նախատեսվում է անցկացնել 2026 թվականի նոյեմբերի 10-ին Երևանում: Խորհրդի նախագահության ստանձնումը Հայաստանի Հանրապետության կողմից ենթադրում է ոչ միայն Խորհրդի աշխատանքների շարունակական համակարգում, այլև Խորհրդի հաջորդ նիստը միջազգային ճանաչում ունեցող պրակտիկային և չափանիշներին համապատասխան կազմակերպելու, ինչպես նաև ընդունող երկրի վրա դրված արձանագրային և կազմակերպչական պարտավորությունների պատշաճ ապահովում: Խորհրդի նիստի կազմակերպման շրջանակներում նախատեսվում է ապահովել Խորհրդի անդամ պետությունների արդարադատության նախարարների, փաստաբանական և նոտարական գործունեության ոլորտում ԱՊՀ անդամ պետությունների հիմնական կազմակերպությունների ղեկավարների, այլ պաշտոնատար անձանց մասնակցությունը, անցկացնել մասնագիտական քննարկումներ և երկկողմ և բազմակողմ հանդիպումներ, ինչպես նաև կազմակերպել հյուրերի ընդունելություն: Միջոցառումը հնարավորություն կտա ամրապնդել արդարադատության ոլորտում հաստատված համագործակցությունը Հայաստանի Հանրապետության և ԱՊՀ անդամ պետությունների միջև, ընդլայնել մասնագիտական կապերը, խթանել փոխադարձ հետաքրքրություն ներկայացնող ոլորտներում հետագա համագործակցության հնարավորությունները և պատշաճ կերպով ապահովել Խորհրդում Հայաստանի Հանրապետության նախագահության բարձր պատասխանատվության կատարումը: