ԲՀԿ մամուլի քարտուղար․ Ծառուկյանի բիզնեսի նկատմամբ իշխանությունների գործողությունները կհանգեցնեն արտագաղթի ալիքի

Արմինֆո.  Գագիկ Ծառուկյանի "Բարգավաճ Հայաստան" կուսակցության մամուլի քարտուղար Իվետա Տոնոյանը պատմել է, թե ինչ վնասներ է կրում պետությունը Հայաստանի իշխանության անհեռատես քաղաքականության հետևանքով, որը հետապնդում է ընդդիմության առաջնորդներին:

Այդ առնչությամբ սեպտեմբերի 10-ին Երևանում կայացած մամուլի ասուլիսի ժամանակ Տոնոյանը հիշեցրել է, որ վերջին երկու ամիսներին "Մուլտի Գրուպ Կոնցեռն" (պատկանում է ԲՀԿ առաջնորդ Գագիկ Ծառուկյանին-խմբ.) կազմակերպության մեկ տասնյակից ավելի ընկերությունների գործունեությունը  մինչ օրս չի վերականգնվել: Բացառություն են կազմում "Արարատցեմենտ" գործարանը, Երևանի "Նոյ" գինու-օղու-կոնյակի գործարանը, որոնք ազգայնացվել են, ինչպես նաև "Մուլտի Վելնես" մարզահամալիրը, որը, նրա խոսքով, ապօրինի հիմունքներով անցել է Երևանի քաղաքապետարանի կառավարման ներքո:

"Մուլտի Վելնես" մարզահամալիրի մասով նախաձեռնվել է երկու քրեական գործ, մեկը՝ Երևանի քաղաքապետարանի դեմ, մյուսը՝ Կադաստրի կոմիտեի դեմ։ Քանի որ Երևանի քաղաքապետարանը "Մուլտի Վելնես"-ը շահագործելու ոչ մի իրավունք չունի։ Այսինքն, այս ամենն ապօրինի է իրականացվում։ Ինչ վերաբերում է "Արարատ-ցեմենտ" գործարանին և կոնյակի գործարանին, որտեղ կառավարությունը նշանակել է իր ղեկավարներին, ապա այստեղ նույնպես տագնապալի իրավիճակի ենք բախվում։ Օրինակ ՝ "Արարատ-ցեմենտ" գործարանի վերաբերյալ մենք տեղեկություններ ունենք, որ վերջին երկու ամսում 20 տոկոսով բարձրացել է ցեմենտի գինը, ինչը միանշանակ կազդի շինարարական բիզնեսի վրա, կբարձրացնի բնակարանների գները, և՝ ոչ միայն։ Այսինքն ՝ այստեղ գործ ունենք պրոֆեսիոնալ մենեջմենթի բացակայության հետ։ Իսկ "Նոյ" գործարանից տեղեկություններ ենք ստանում, որ զանգվածային կրճատումներ են իրականացվում",- հաղորդել է ԲՀԿ մամուլի քարտուղարը։

"Մուլտի Գրուպ կոնցեռնի" կազմի մեջ մտնող ընկերությունների գործունեության կասեցումը (այդ ընկերությունները կապարակնքված են, դրանց գործունեությունը կասեցված է - խմբ.), ինչպես նշել է Տոնոյանը, նույնպես հղի է տնտեսական հետեւանքներով: "Այստեղ մենք ունենք ողբերգական տնտեսական վիճակագրություն, որը ցույց է տալիս, որ բացի կազմակերպությանը հսկայական վնաս հասցնելուց, վնաս է հասցվում նաև պետական բյուջեին։ Օրինակ ՝ "Մուլտի Տաբակ" ընկերությունը վերջին երկու ամսում կրել է մոտ 4 միլիարդ դրամի վնաս։ Եվ կարելի է հեշտությամբ հաշվարկել, թե որքան հարկ կարող էր վճարվել պետբյուջե։ Դրանից օբյեկտիվ հարց է ծագում․ ո՞րն է պետության շահը ՝ միտումնավոր վնաս հասցնել իրեն։ Այս իշխանությունն այնքան մեծ ցանկություն ունի՝ ամեն գնով վրեժ լուծելու, որ այդ հանգամանքը նրանց ամենևին չի հետաքրքրում", - կարծում է ԲՀԿ մամուլի քարտուղարը։ Տոնոյանը կարծում է, որ ԲՀԿ ղեկավարի բիզնեսի նկատմամբ Հայաստանի իշխանությունների գործողությունները կհանգեցնեն արտագաղթի ալիքի, որի մասին գործող իշխանությունները, պարզապես, չեն մտածում: Այդ առումով նա ուշադրություն է հրավիրել այն հանգամանքի վրա, որ Ծառուկյանի հետ կապված ընկերությունների ավելի քան 10 հազար աշխատակիցներ հարկադիր արձակուրդում են, հետևաբար, աշխատավարձ չեն ստանում։ "Ժողովրդավարության բաստիոն հռչակված Հայաստանի Հանրապետությունում մարդու իրավունքների պաշտպանությունը վերածվել է մի ոլորտի, որն ինքն օգնության կարիք ունի։ Այն գործընթացները, որոնք այսօր տեղի են ունենում Հայաստանում ընդդիմադիր գործիչների նկատմամբ, ոչ այլ ինչ են, քան քաղաքական վենդետա։ Բոլոր նրանք, ովքեր մի փոքր ծանոթ են ԲՀԿ առաջնորդ Գագիկ Ծառուկյանի, "Ուժեղ Հայաստան" դաշինքի առաջնորդ Սամվել Կարապետյանի, ՀՀ երկրորդ նախագահ Ռոբերտ Քոչարյանի և մյուս քաղբանտարկյալների նկատմամբ հարուցված քրեական գործերին, տեսնում են, որ դրանց մեջ բացակայում է իրավական բաղադրիչը", - ամփոփել է ԲՀԿ մամուլի քարտուղարը:

Հիշեցնենք, որ հուլիսի 6-ին "Բարգավաճ Հայաստան" կուսակցության առաջնորդ և գործարար Գագիկ Ծառուկյանին ձերբակալել և տեղափոխել էին Հայաստանի Քննչական կոմիտե: Նա մեղադրվում է խարդախություն կազմակերպելու և առանձնապես խոշոր չափերով դրամական միջոցներ օրինականացնելու (լվանալու) համար։ Քննության վարկածով՝ 2022-2024 թվականներին նրա ղեկավարությամբ գործող խումբը Հայաստանի և Իրանի միջև առևտրատնտեսական կապերի զարգացման պատրվակով Իրանի քաղաքացիների մասնակցությամբ ստեղծել է համատեղ իրավաբանական անձինք, որից հետո իրականացրել է խարդախ սխեմա ՝ պատճառելով ավելի քան 21 մլն դոլարի վնաս։ Բացի այդ, Գագիկ Ծառուկյանին ևս մեկ մեղադրանք է առաջադրվել՝ ապօրինի որսի համար: Հուլիսի 7-ին դատարանը բավարարել է Ծառուկյանին երկու ամսով կալանավորելու մասին մեղադրող կողմի միջնորդությունը: Սեպտեմբերի 4-ին դատարանը երկարաձգել է Ծառուկյանի կալանքի ժամկետը ևս երկու ամսով։ Գործի շրջանակներում հուլիսի 6-ին իրավապահ մարմինները խուզարկություններ են անցկացրել Ծառուկյանի հետ կապված ավելի քան 70 հասցեներում, ինչից հետո բոլոր ձեռնարկությունների դռները կապարակնքվել էին։ Դրանց մի մասն ազգայնացվել է պետության կողմից:

Հավելենք, որ կալանքի տակ է նաև ՀՀ երկրորդ նախագահ Ռոբերտ Քոչարյանը: Նրան մեղադրանք է առաջադրվել առանձնապես խոշոր չափերով փողերի լվացման, պաշտոնեական դիրքը չարաշահելու և խոշոր չափերի կաշառք ստանալու համար: Գործի շրջանակներում մեղադրանք է առաջադրվել ևս 9 անձի: Օգոստոսի 27-ին Քոչարյանը Հակակոռուպցիոն դատարանի որոշմամբ երկու ամսով կալանավորվել է։ Իսկ "Ուժեղ Հայաստան" դաշինքի առաջնորդ Սամվել Կարապետյանը տնային կալանքի տակ է։ Նրան մեղսագրվում են երկրում իշխանությունը զավթելու հրապարակային կոչեր։ Ավելի ուշ կուսակցության առաջնորդին նոր մեղադրանքներ են առաջադրվել՝ փողերի լվացում և առանձնապես խոշոր չափերով գույքի հափշտակություն: