Փաստաբան. Գագիկ Ծառուկյանը ձերբակալվել է խարդախությանն օժանդակելու մեղադրանքով

Արմինֆո. «Բարգավաճ Հայաստան» կուսակցության առաջնորդ, գործարար Գագիկ Ծառուկյանը, ում տանը վաղ առավոտից խուզարկություններ էին ընթանում, ձերբակալվել է, դատարան է ներկայացվելու նրան կալանավորելու միջնորդություն։ Հուլիսի 6-ին գործարարի տան դիմաց լրագրողների հետ զրույցում այս մասին հայտնել է նրա փաստաբաններից Երեմ Սարգսյանը։

Նրա խոսքով՝ Ծառուկյանին այժմ տեղափոխում են Քննչական կոմիտե, որտեղից նրան կտանեն դատարան, որտեղ էլ կքննվի նրա նկատմամբ խափանման միջոց ընտրելու հարցը։

«Մեղադրանքները շատ ծիծաղելի են և աբսուրդային՝ օժանդակություն խարդախությանը և օժանդակություն փողերի լվացմանը։ Շատ մանրամասներ չենք ներկայացնի, բայց այնտեղ, որտեղ Ծառուկյանը կամ նրա հետ որևէ կերպ կապված ընկերությունները պետք է ճանաչվեին տուժող, նրանց մեղադրանք է առաջադրվել։ Խոսքը հայ-իրանական համատեղ առևտրաարդյունաբերական պալատի մասին է։ Գագիկ Ծառուկյանը փորձել է աջակցել Հայաստանի և Իրանի միջև առևտրային հարաբերությունների զարգացմանը»,- ասել է փաստաբանը։

Սարգսյանը պատմել է, որ Իրանի որոշ քաղաքացիներ այդ ընթացքում թույլ են տվել որոշակի չարաշահումներ, և այդ կապակցությամբ հանցագործության մասին հաղորդումներ կան ներկայացված թե՛ այստեղ, թե՛ Իրանում։ Փաստաբանի խոսքով՝ իրանական կողմը հանցագործության վերաբերյալ նյութերն ուղարկել է Հայաստան, և հայաստանյան իրավապահ մարմինները չգիտես ինչու որոշել են հիմք ընդունել այդ նյութերը և Ծառուկյանին դարձնել մեղադրյալ այն դեպքում, երբ նա պետք է ճանաչվեր տուժող։

Ծառուկյանի պաշտպանությունը տարակուսանք է հայտնել, որ այստեղ ոտնահարվում են Հայաստանի քաղաքացու իրավունքները։ Նա համոզմունք է հայտնել, որ տեղի ունեցողը քաղաքական ենթատեքստ ունի։ Սարգսյանի խոսքով՝ այն փաստը, որ Քննչական կոմիտեն, դատախազությունը և ՀՀ ԱԱԾ-ն միաժամանակ գործել են տարբեր գործերով, խոսում է այն մասին, որ քայլերը ձեռնարկվել են մեկ կետից ստացված ազդանշանից հետո։

Սարգսյանը փաստել է, որ Հայաստանի ողջ իրավապահ համակարգը, ավելի քան 70 հասցեներում խուզարկություններ իրականացնելուց հետո, կնքել է դրանք։ Նրա խոսքով՝ դա նշանակում է, որ այդ բոլոր կազմակերպությունների, ընկերությունների, գործարանների աշխատանքը կաթվածահար է եղել, հետևաբար՝ ավելի քան 1000 քաղաքացի կմնա առանց աշխատանքի, վնաս է հասցվում նաև պետությանը։ «Դա նշանակում է, որ Ծառուկյանի նկատմամբ կիրառվում են պետական լծակներ։ Որոշում են կայացրել նաև վերցնել Ծառուկյանի կենդանիներին և տանել Երևանի կենդանաբանական այգու փոքր վանդակներ։ Այս ամենը խոսում է այն մասին, որ նրանք ցանկանում են ցավ պատճառել»,- նշել է Սարգսյանը։

Հիշեցնենք, որ գործարար Գագիկ Ծառուկյանը Հայաստանի գործող իշխանությունների թիրախում է հայտնվել երկրում խորհրդարանական ընտրություններին մասնակցելու մասին հայտարարելուց հետո։ Հայաստանի վարչապետ Նիկոլ Փաշինյանը նախընտրական քարոզարշավի ընթացքում հրապարակայնորեն հայտարարել էր Ծառուկյանի ընտանիքին պատկանող «Արարատցեմենտ» գործարանը ազգայնացնելու մտադրության մասին, ինչից հետո Գլխավոր դատախազությունը դիմել էր դատարան՝ ձեռնարկության սեփականաշնորհումն անվավեր ճանաչելու պահանջով։ Միաժամանակ իրավապահ մարմինները հետաքննություն են սկսել հենց Ծառուկյանի նկատմամբ՝ առանձնապես խոշոր չափերի հարկերից խուսափելու մեղադրանքով։ Բացի այդ, դատախազությունը պահանջում է բռնագանձել Կոտայքի նախկին մարզպետ Կարապետ Գուլոյանի և նրա կնոջ՝ «Բարգավաճ Հայաստան» ընդդիմադիր կուսակցության առաջնորդի դուստր Ռոզա Ծառուկյանի գույքը՝ հայտարարելով ակտիվների ենթադրյալ ապօրինի ծագման մասին։