Արդշինբանկը կրկին ՎԶԵԲ տարեկան ժողովի և բիզնես ֆորումի գլխավոր հովանավորն է

Արմինֆո. Արդշինբանկը երկրորդ անգամ ստանձնեց Վերակառուցման և զարգացման եվրոպական բանկի (ՎԶԵԲ) տարեկան ժողովի և բիզնես ֆորումի գլխավոր հովանավորի դերը (Flagship Sponsor)՝ վերահաստատելով իր ակտիվ ներգրավվածությունը միջազգային ֆինանսական համագործակցության և տնտեսական զարգացման օրակարգում։

 Հունիսի 5-7-ը Ռիգայում անցկացված՝ «Անկայունությունից դեպի ճկունություն․ տնտեսությունները փոփոխվող աշխարհում» խորագրով համաժողովը համախմբել էր միջազգային ֆինանսական հաստատությունների, ներդրումային կազմակերպությունների, պետական հատվածի և գործարար համայնքի ներկայացուցիչների։ Պանելային քննարկումների և բիզնես հանդիպումների առանցքում համաշխարհային տնտեսության զարգացման հեռանկարներին, նորարարական լուծումներին, կայուն զարգացմանը, թվային փոխակերպումներին և մասնավոր հատվածի մրցունակության բարձրացմանը վերաբերող հարցեր էին։

Ֆորումի շրջանակում տեղի ունեցավ պանելային քննարկում, որ ամբողջությամբ նվիրված էր Հայաստանին՝ «Դիմակայունությունից դեպի մրցունակություն. Հայաստանի ներդրումային նոր տեսլականը» թեմայով, որին մասնակցեց Արդշինբանկի խորհրդի անդամ Հասմիկ Ղահրամանյանը։ Նա նշեց, որ վերջին տասնամյակում Հայաստանում ձևավորված մակրոտնտեսական կայունությունն ու ներդրումների համար բարենպաստ միջավայրը կարևոր դեր են ունեցել երկրի տնտեսական առաջընթացի ապահովման գործում։

«Վերջին տասնամյակում ՀՀ-ում վարկեր/ՀՆԱ հարաբերակցությունը 40%-ից աճել է մինչև շուրջ 70%՝ էականորեն նպաստելով տնտեսական աճին։ Միաժամանակ, տնտեսական հետագա առաջընթացում բանկային համակարգի դերակատարությունը պայմանավորված կլինի ոչ միայն ավանդական վարկավորման ծավալների աճով, այլև ենթակառուցվածքների զարգացմանն ու արտադրողականության բարձրացմանն ուղղված այլ ներդրումների ընդլայնմամբ»,- նշեց նա՝ հավելելով, որ Արդշինբանկն ակտիվորեն մասնակցում է ենթակառուցվածքային ծրագրերի ֆինանսավորմանը, գյուղատնտեսության և արդյունաբերության արդիականացմանը, ջրային տնտեսության զարգացմանը, ինչպես նաև ժամանակակից տեխնոլոգիական լուծումների ներդրմանը՝ դրանով իսկ բարձրացնելով ՀՆԱ-ի ներուժը։

Ֆորումի ընթացքում բանկը հանդես եկավ նաև որպես բովանդակային գործընկեր՝ կազմակերպելով «Ալգորիթմներից այն կողմ. արհեստական բանականության էվոլյուցիան» թեմայով պանելային քննարկումը, որը վարեց Արդշինբանկի վարչության անդամ, ռիսկերի կառավարման տնօրեն Լուսինե Ներսիսյանը։

Քննարկմանը մասնակից միջազգային փորձագետները ներկայացրեցին, թե ինչպես է արհեստական բանականությունն (ԱԲ) աստիճանաբար վերածվում ոչ միայն աշխատանքների արդյունավետության բարձրացման գործիքի, այլև տնտեսության, բիզնեսի և կառավարման գործընթացների փոխակերպման առանցքային գործոնի։ Անդրադարձ կատարվեց գեներատիվ և գործակալական ԱԲ համակարգերի զարգացման հեռանկարներին, ինչպես նաև պատասխանատու ԱԲ-ի թափանցիկության, կառավարման և մարդկային վերահսկողության կարևորությանը։

ՎԶԵԲ տարեկան ժողովի և բիզնես ֆորումի գլխավոր հովանավորի կարգավիճակը հերթական անգամ ընդգծեց Արդշինբանկի միջազգային հեղինակությունն ու բանկի հանձնառությունը՝ աջակցելու Հայաստանի տնտեսության մրցունակության բարձրացմանը, մասնավոր հատվածի զարգացմանը, նորարարական նախաձեռնությունների առաջխաղացմանը և միջազգային համագործակցության ընդլայնմանը։

Հիշեցնենք, որ 2024 թվականին Երևանում անցկացված ՎԶԵԲ 33-րդ տարեկան ժողովը և բիզնես ֆորումը նույնպես կազմակերպվել էր Արդշինբանկի գլխավոր հովանավորությամբ՝ Հայաստանը դարձնելով միջազգային ֆինանսատնտեսական քննարկումների կարևոր հարթակներից մեկը։

1991 թվականին հիմնադրված Վերակառուցման և զարգացման եվրոպական բանկի բաժնետերերն են 77 պետություններ, Եվրոպական միությունը և Եվրոպական ներդրումային բանկը։ Իր գործունեության ընթացքում ՎԶԵԲ-ը ներդրել է ավելի քան 220 միլիարդ եվրո՝ աջակցելով մասնավոր հատվածի զարգացմանը, կայուն տնտեսական աճին և տնտեսական վերափոխումներին Եվրոպայում, Կենտրոնական Ասիայում, Մերձավոր Արևելքում և աֆրիկյան մի շարք երկրներում։

Հայաստանը ՎԶԵԲ-ի անդամ է դարձել 1992 թվականի դեկտեմբերի 7-ին՝ բանկի կանոնադրական կապիտալում կատարելով 10 միլիոն եվրոյի ներդրում։ Հայաստանի և ՎԶԵԲ-ի համագործակցության հիմնական ուղղություններն են էներգետիկան, տրանսպորտը և ֆինանսական ոլորտը։