Էդմոն Մարուքյան. 1,7 միլիոն մարդ պետք է գնա ընտրատեղամասեր, այդ դեպքում այս իշխանությունը կջախջախվի

Արմինֆո.Այսօր վաղ առավոտվանից Հայաստանում իրականացվում են զանգվածային ձերբակալություններ, ինչը կապված է ՀՀ վարչապետ Նիկոլ Փաշինյանի երեկվա հայտարարության հետ։ Այս մասին հունիսի 5-ին ՀՀ Ազգային ժողովի շենքի դիմաց անցկացվող ակցիայի ժամանակ հայտարարել է «Լուսավոր Հայաստան» կուսակցության առաջնորդ Էդմոն Մարուքյանը։

Նա հիշեցրել է արևմտամետ քաղաքական ուժերի ներկայացուցիչների կողմից Փաշինյանին ուղղված հարցը՝ ընտրապայքարից ընդդիմադիր երկու քաղաքական դաշինքներին հանելու անհրաժեշտության մասին, ինչին ի պատասխան հայկական կառավարության ղեկավարն առաջարկել է նրանց գրավոր դիմում ներկայացնել Կենտրոնական ընտրական հանձնաժողով։ Ամբողջ խնդիրն այն է, որ, ըստ էության, խոսքը գնում է ընտրական գործընթացից այս կամ այն քաղաքական ուժին հեռացնելու նպատակով վարչական ռեսուրսի կիրառման մասին։ «Ինչո՞ւ է դա իրենց պետք։ Նրանք տեսնում են, որ մարդկանց հսկայական բանակ պատրաստ է գնալ ընտրատեղամասեր, և իրենց համար անցանկալի քաղաքական ուժերին հեռացնելու միջոցով ցանկանում են դեպրեսիայի մեջ գցել ժողովրդին, որպեսզի ստիպեն նրան հրաժարվել ընտրություններին մասնակցելուց։ Մենք հետևելու ենք իրավիճակին, բայց ինչ էլ որ պատահի, 1,7 միլիոն մարդ պետք է գնա ընտրատեղամասեր. այդ դեպքում, նույնիսկ տարբեր մեխանիզմների կիրառման պարագայում, այս իշխանությունը կջախջախվի»,- վստահեցրել է Էդմոն Մարուքյանը՝ հավելելով, որ Փաշինյանն այսօր գնում է Բելառուսի նախագահ Ալեքսանդր Լուկաշենկոյի ուղիով։