ՀՀ վարչապետ. հայ ժողովուրդն Առաջին հանրապետության օրը նշում է բոլորովին նոր պատմական իրադրությունում

Արմինֆո.Հայ ժողովուրդն Առաջին հանրապետության օրը նշում է բոլորովին նոր պատմական իրադրությունում։ Այս մասին մայիսի 28-ին տոնին նվիրված զինվորական շքերթի ժամանակ հայտարարել է ՀՀ վարչապետ Նիկոլ Փաշինյանը։

Նրա խոսքով՝ 35 տարի անց Հայաստանի և Ադրբեջանի միջև խաղաղություն է հաստատվել՝ հենց այն խաղաղությունը, որը պակասում էր Առաջին հանրապետության շրջանում՝ պետությունը պահպանելու և զարգացնելու համար։ Դրա բացակայությունն էր պատճառը, որ 1918-1920 թվականներին Հարավային Կովկասի պետությունները, որոնք մեկը մյուսի հետևից անկախություն էին հռչակել, 1920 թվականին մեկը մյուսի հետևից կորցրեցին այն։ Այսօր, ինչպես նշել է Փաշինյանը, խոսքն այն մասին է, որ Հայաստանի Հանրապետությունը պետք է գոյություն ունենա հավերժ։ «Դա նշանակում է, որ բոլոր իրավիճակներում անհրաժեշտ է կենտրոնացած լինել պետության շահերի վրա, և հենց խաղաղությունն է պետության, նրա անվտանգության, ազատության և բարօրության շահը։ Պետությունը դառնում է ժողովրդի անվտանգության, ազատության և բարօրության գործիք»,- նշել է ՀՀ վարչապետը։

Նա հավելել է, որ խաղաղության հետագա ինստիտուցիոնալացումը, երկրի դուրսբերումը շրջափակումից, Հայաստանի վերածումը խաղաղության խաչմերուկի՝ TRIPP ծրագրի հետ մեկտեղ, հայ ժողովրդի անվտանգության, ազատության և բարօրության ապահովումը երկրի իշխանությունների առաջնահերթությունն է։ Այս նպատակին հասնելու համար կարևոր նշանակություն է ստանում կրթությունը, որի զարգացումը ճանաչվել է որպես «ռազմավարությունների ռազմավարություն»,- նշել է հայկական կառավարության ղեկավարը։

Նա ընդգծել է, որ այսօր հայկական բանակը հանդիսանում է ոչ թե պատերազմի, այլ խաղաղության գործոն։ Թույլ զինված ուժերը կարող են գրավիչ լինել ագրեսիայի համար։ «Մենք մեզ նման բան թույլ տալ չենք կարող, և մեզ համար մեծ պատիվ է այսօր՝ Առաջին հանրապետության օրը, ներկայացնել այն արդյունքները, որոնց հաջողվել է հասնել՝ սկսած 2022 թվականից։ Այսօր շքերթում ժողովրդին է ներկայացվում նոր բանակ, նոր զինտեխնիկա, նոր համազգեստ և նոր գաղափարախոսություն։ Մինչև 2022 թվականը սպառազինությունների համաշխարհային շուկան փակ կամ սահմանափակ էր Հայաստանի համար, որովհետև միջազգային գործընկերները հրաժարվում էին զենք վաճառել Հայաստանին՝ մտավախություն ունենալով, որ երկիրն այդ սպառազինությունը կկիրառի իր միջազգայնորեն ճանաչված սահմաններից դուրս։ Եվ միայն 2022 թվականի հոկտեմբերի 6-ին Պրահայում ձեռք բերված պայմանավորվածություններից հետո, որոնց համաձայն Հայաստանն ու Ադրբեջանը ճանաչեցին միմյանց տարածքային ամբողջականությունը՝ համաձայն Ալմա-Աթայի հռչակագրի, սպառազինությունների միջազգային շուկան բացվեց հայկական պետության համար»,- ասել է Նիկոլ Փաշինյանը։

Նա նկատել է, որ շքերթում ներկայացվելու է 7 երկրների արտադրության տեխնիկա և սպառազինություն։ Մատակարարումների աշխարհագրության ընդլայնումը նույնպես «Իրական Հայաստանի» գաղափարախոսության արդյունքն է։ Ոչ պակաս կարևոր գործոն է նաև այն, որ շքերթում ներկայացվելու են հենց Հայաստանում արտադրված սպառազինություն և զինտեխնիկա, որոնք առաջին քայլերն են անում միջազգային շուկայում։ 2022 թվականից ի վեր ՀՀ կառավարությունը շուրջ 170 միլիարդ դրամ է ուղղել պետության ռազմարդյունաբերական համալիրի զարգացմանը, և այսօր արդեն կան առաջին արդյունքները, որոնցով կարելի է հպարտանալ։

Վարչապետը հերթական անգամ հավաստիացրել է ներկաներին, որ այսօր Հայաստանի Հանրապետությունն անկախ է, ազատ և անվտանգ, ինչպես երբեք նախկինում։

Նշենք, որ Հանրապետության հրապարակում շքերթը հրամանատարում էր ՀՀ ԶՈւ Գլխավոր շտաբի պետ Էդուարդ Ասրյանը, շքերթն ընդունում էր ՀՀ պաշտպանության նախարար Սուրեն Պապիկյանը։ Այն անցկացվում է առաջին անգամ վերջին 10 տարվա ընթացքում։ Շքերթում ներկայացված է Ռուսաստանի, Հնդկաստանի, Ֆրանսիայի, Իրանի, Չինաստանի և մի շարք այլ պետությունների արտադրության տեխնիկա։