Ամենայն Հայոց Կաթողիկոսը և Հայաստանի նախկին նախագահները շնորհավորել են հայ ժողովրդին Առաջին Հանրապետության օրվա առթիվ

Արմինֆո.Ամենայն Հայոց Կաթողիկոս Գարեգին Բ-ն, Հայաստանի երկրորդ նախագահ Ռոբերտ Քոչարյանը և երրորդ նախագահ Սերժ Սարգսյանը շնորհավորել են հայ ժողովրդին Առաջին Հանրապետության օրվա առթիվ։

Ինչպես հայտնում են Մայր Աթոռ Սուրբ Էջմիածնի տեղեկատվական համակարգից, Ամենայն Հայոց Կաթողիկոսն իր ուղերձում ընդգծել է, որ այս օրը հայ ժողովուրդը հիշում է Սարդարապատի, Ղարաքիլիսայի և Բաշ-Ապարանի հերոսամարտերը։ «Ամենայն Հայոց Կաթողիկոս Գևորգ Ե-ն վճռորոշ դեր է խաղացել գոյապայքարի այս պատմական ճակատամարտերում։ Կենաց ու մահու պայքարում մեր ժողովրդի քաջարի զավակները, այդ թվում՝ մեր Սուրբ Հայ Առաքելական Եկեղեցու (ՀԱԵ) հոգևորականները, հաղթանակ տարան և սերունդներին ապահովեցին հայրենի հողում անկախ ու ազատ ապրելու արդար իրավունքը», - նշել է Գարեգին Բ-ն։

Նույն անվեհեր ոգով, ինչպես նշել է Ամենայն Հայոց Կաթողիկոսը, հայ ժողովրդի նվիրյալ զավակները նոր ժամանակներում անձնուրացաբար պաշտպանել են Հայրենիքը, շատերը տվել են իրենց անգնահատելի կյանքը հայոց պետականության անսասանության և անվտանգ ու արժանապատիվ ապագայի համար։ «Այսօր մենք համազգայնորեն խոնարհվում ենք մեր հերոսների առջև և նրանց պայծառ հիշատակը հավերժ վառ պահում մեր սրտերում։ Այս դժվարին ժամանակներում, արտաքին և ներքին մարտահրավերների հանդիման, մենք պետք է միավորվենք և միասին զորացնենք մեր պետությունը, բոլոր հայերի կյանքը դարձնենք բարօր ու գեղեցիկ», - ընդգծել է Գարեգին Բ-ն։

Հանրապետության օրվա առթիվ ուղերձով է հանդես եկել նաև Հայաստանի երկրորդ նախագահ Ռոբերտ Քոչարյանը։ Նա հիշեցրել է, որ Սարդարապատում հայ ժողովուրդն ապացուցեց, որ ընդունակ է դժվարին ժամանակներում համախմբվել և փրկել պետականությունը, ինչի կապակցությամբ կոչ է արել Հայաստանի քաղաքացիներին արիություն դրսևորել և հունիսի 7-ի խորհրդարանական ընտրությունների քվեարկությամբ կրկին ցուցադրել միասնություն ու իշխանությունից զրկել երկրի գործող ղեկավարությանը։ «Սարդարապատում դա արվեց զինվորական հերոսության ու քաջության շնորհիվ: Հունիսի 7-ին, հետևելով Սարդարապատի միասնության օրինակին, մենք պետք է քաղաքացիական արիություն դրսևորենք։ Մեր քվեարկությամբ մենք պետք է վտարենք արդեն իսկ մեր երկրում գտնվող թշնամուն։ Մեր պետության լավագույն օրերը դեռ առջևում են։ Փա՛ռք Սարդարապատի հերոսներին», - ընդգծել է Քոչարյանը։

Իր հերթին Հայաստանի երրորդ նախագահ Սերժ Սարգսյանն իր ուղերձում հիշեցրել է, որ ավելի քան մեկ դար առաջ հայ ժողովրդի համար մայիսի 28-ը դարձավ ոչ միայն պետականության վերականգնման, այլև արժեքային փորձության օր։ «Ազգային ինքնագիտակցությունը, ազատ ու արժանապատիվ ապրելու կամքը թույլ չտվեցին, որ գլուխ բարձրացնեն կոնֆորմիզմը, վախը, թուլամորթությունը, պառակտումը և այն բոլոր հիվանդությունները, որոնք հուսահատությունն ու պարտությունը սերմանում են ազգի մեջ: Մայիսի 28-ն առաջին հերթին ոգու հաղթանակ էր, որն ապացուցեց պարզ ճշմարտությունը՝ ուժը չի չափվում միայն զինվորների ու զենքի քանակով։ Օտարի լծի տակ վախի մեջ գոյատևելը մահից վատ է, սեփական ազգը չհիշելով, հայրենիք չունենալով ապրելը՝ նվաստացում, իսկ հայրենիքում ազատ ու արժանապատիվ ապրելը՝ կենսական անհրաժեշտություն։ Սարդարապատի, Բաշ-Ապարանի և Ղարաքիլիսայի հերոսամարտերի ծանր, բայց վճռորոշ հաղթանակների խորքային իմաստը հենց դրանում է։ Հավերժ փա՛ռք անկախ հայոց պետականությունը վերականգնողներին՝ զինվորից մինչև բանվոր, մտավորական ու հոգևորական։ Պատիվ ու փա՛ռք ազգային-պետական գործիչներին, ովքեր անձնուրացաբար կերտեցին Առաջին Հանրապետությունը»,- ընդգծել է Հայաստանի երրորդ նախագահը։

Միևնույն ժամանակ, Սարգսյանը դատապարտել է Հայաստանի իշխանությունների կողմից Հանրապետության օրը զինվորական շքերթի անցկացումը՝ հաշվի առնելով, որ երկիրն այսօր բախվում է բազմաթիվ խոչընդոտների ու սպառնալիքների։ «Այսօր հայ ժողովուրդը կրկին կանգնած է պատմական ծանր հանգրվանի առջև, երբ պատերազմում պարտության և պետական կառավարման ձախողման հետ ասոցացվող կապիտուլյանտ իշխանությունները, վատնելով պետական հսկայական ռեսուրսներ, Հանրապետության հրապարակում ցինիկաբար կազմակերպում են զինվորական շքերթի բեմադրություն՝ պատերազմի չհաղթահարված հետևանքների, հազարավոր զոհերի, տարածքային կորուստների, Հայաստանի որոշ սահմանամերձ տարածքների օկուպացիայի, հազարավոր բռնի տեղահանված արցախցիների, մինչ օրս բաքվի բանտերում տառապող հայ ռազմագերիների, անհայտ կորածների և խոցելի դարձած պետական սահմանների պայմաններում»,- հիշեցրել է Հայաստանի երրորդ նախագահը։

Սարգսյանը դա անվանել է անբարոյական քաղաքական քայլ երկրում առաջիկա խորհրդարանական ընտրություններից առաջ, որի նպատակն է թաքցնել պատերազմի աղետալի հետևանքներն ու բանակի ներկայիս մխիթարական վիճակը, մոռացության մատնել դրա պատասխանատվությունը և պետական միջոցների հաշվին ապահովել տպավորիչ ինքնագովազդ: «Այս ամենի ֆոնին անիմաստ է նույնիսկ խոսել այդ շոուի բովանդակության մասին։ Բանակը նախընտրական դեկորացիա չէ, այլ մեր ժողովրդի ծնունդը, նրա հպարտությունը, արժանավոր զավակը, բայց այսօր, ցավոք, լքված զավակը։ Առաջիկա ընտրություններն այս իրավիճակը փոխելու հնարավորություն են։ Եվ ես կրկին կոչ եմ անում մեր քաղաքացիներին համախմբվել մեկ նպատակի շուրջ՝ հունիսի 7-ին «Ո՛չ» ասել պարտությանը, հուսահատությանը և ազգային արժեքների նվաստացման խորհրդանիշ դարձած ուժին ու նրա արբանյակներին, սկիզբ դնել բանակի վերականգնմանը, պետականության և Հայոց ազգային եկեղեցու դիրքերի ամրապնդմանը։ Մեր ժողովուրդը միայն այսպես կապացուցի, որ արժանի է հաղթական բանակ ունեցող պետության զինվորական շքերթին»,- եզրափակել է Հայաստանի երրորդ նախագահը։

Հիշեցնենք, որ մայիսի 28-ին Հայաստանում նշում են Առաջին Հանրապետության օրը։ Այս օրը Հանրապետության հրապարակում անցկացվում է շքերթ, որտեղ երկրի իշխանությունները ցուցադրում են նոր ձեռք բերված սպառազինությունը։ Նշենք, որ Հայաստանում վերջին մասշտաբային զինվորական շքերթը տեղի է ունեցել 2016 թվականի սեպտեմբերի 21-ին Երևանի Հանրապետության հրապարակում՝ 2016 թվականի ապրիլյան քառօրյա պատերազմից հետո։