Դարբինյան․ Հայաստանի երեք հիմնական ընդդիմադիր ուժերին Ռուսաստանի բացահայտ աջակցությունը ձեռնտու է միայն Փաշինյանին

Արմինֆո.  Պաշտոնական Ռուսաստանի և ռուսական ԶԼՄ-ների բացահայտ աջակցությունը Հայաստանում հունիսյան խորհրդարանական ընտրություններին մասնակցող երեք գլխավոր ընդդիմադիր ուժերին՝ ձեռնտու է միայն գործող վարչապետ Նիկոլ Փաշինյանին: Այդ մասին հայտարարել է Հայաստանի յոթերորդ վարչապետ, պրոֆեսոր, Ռուսաստանի գիտությունների ակադեմիայի արտասահմանյան անդամ Արմեն Դարբինյանը՝ հայտնի լրագրող (արտասահմանյան գործակալ - խմբ.) Վիտալի Դիմարսկու հետ հարցազրույցում։

Նրա կարծիքով ՝ այսօր արհեստականորեն ստեղծվում է տպավորություն է, թե, իբր, կա իշխող ուժ ("Քաղաքացիական պայմանագիր" - խմբ.) և կան ռուսամետ "հրեշներ", որոնք ցանկանում են տապալել այդ ուժին: "Ռուսաստանը՝ և պաշտոնական, և զանգվածային լրատվամիջոցները, անթաքույց աջակցում են այս երեք ուժերին (նկատի են առնվում Գագիկ Ծառուկյանի, Սամվել Կարապետյանի և Ռոբերտ Քոչարյանի ուժերը - խմբ.) ՝ դրանով իսկ ստեղծելով հակամարտություն։ Ինձ համար, ընդհանրապես, շատ տարօրինակ է, որ Ռուսաստանում քաղաքական տարածությունից դուրս են մղել բոլոր օլիգարխներին, իսկ Հայաստանում ռուսական կողմը, չգիտես ինչու, աջակցում է նրանց։ Բայց դա ձեռնտու է միայն Հայաստանի գործող իշխանություններին, քանի որ հին կարգերին հարվածելը և օլիգարխներին հարվածելը շատ հեշտ է, և Փաշինյանը դրանում շատ լավ  հաջողության է հասնում", - ուշադրություն է հրավիրել պրոֆեսորը։

Արդյունքում, ըստ Դարբինյանի, ստեղծվում է տպավորություն, որ գոյություն ունեն երկու անտագոնիստական ուժեր՝ Փաշինյանի կուսակցությունը և ռուսամետ "երեք հրեշները", որոնցից երկուսը ներկայացնում են օլիգարխիկ կառույցներ, իսկ երրորդը՝ նախկին նախագահ է: "Այս իրավիճակում, միանշանակ, հաղթում է Փաշինյանը։ Պետք է հասկանալ, որ նա, հավանաբար, լավագույն հրապարակային քաղաքական գործիչն է Հայաստանում, ուստի, նրա համար այդքան հեշտ է հրապարակավ պայքարել օլիգարխների և նախկին իշխանությունների դեմ ։ Օլիգարխները չունեն քաղաքական տեքստ, ունեն միայն մեկ իմաստ՝ վերջ տալ Փաշինյանի իշխանությանը, ընդ որում, նրանց կարգախոսները չափազանց պարզ են։ Իսկ հայ ժողովուրդն ուզում է առաջ շարժվել", - պարզաբանել է Դարբինյանը։

Նույնպիսի արհեստական երկընտրանք է նա համարում  ԵՄ և ԵԱՏՄ միջև ընտրությունը։ Պրոֆեսորի խոսքով՝ Հայաստանը կարող է միաժամանակ լինել երկու կառույցներում։ "Եվ այդ երկընտրանքը նույնպես արհեստականորեն տարածվում է ռուսական կողմից։ Իսկ մեր գործող հայ քաղաքական գործիչները, չգիտես ինչու, ընդունել են այդ նարատիվը։ Բայց կա Սերբիայի օրինակը, որն ազատ առևտուր է անում և ԵԱՏՄ երկրների, և Եվրոպայի հետ։ Այսինքն՝ գտնվում է ազատ առևտրի ռեժիմում։ Եվ Հայաստանը նույնպես կարող է գտնվել ազատ առևտրի ռեժիմում", - վստահ է ՀՀ նախկին վարչապետը։

Բացի այդ, նա համոզմունք է հայտնել, որ ոչ իրավական տարածքում, ոչ տնտեսական, չի կարող քննարկվել ԵԱՏՄ-ից Հայաստանի դուրս գալու հարցը, քանի որ այն կառույցի հիմնադիր երկիրն է: "Ընդհանրապես, ԵԱՏՄ-ն մտահղացվել է որպես քաղաքական կոնֆիգուրացիա։ Այսօր նա մեծ հարցականի տակ է։ Որովհետև, առաջին հերթին, շատ ակտիվ առաջ է ընթանում Թուրքիան և թյուրքական պետությունների համայնքն իր ընդհանուր քաղաքական և տնտեսական, նույնիսկ, ռազմական շահերով։ Երկրորդ՝ ակտիվ է նաև Չինաստանը Կենտրոնական Ասիայի տարածաշրջանում, և այս առումով բոլորովին պատահական չէ, որ Կենտրոնական Ասիայի հինգ երկրներ ստեղծել են փոխգործակցության իրենց առանձին հարթակը ։ Այսինքն ՝ այսօր ընթանում է համաշխարհային քաղաքական տարածքի յուրատեսակ վերաձևավորում ։ Աշխարհում կա երկու երկիր ՝ ԱՄՆ-ը և Չինաստանը, որոնք հավակնում են աշխարհը բաժանել երկու մասի: Այսինքն ՝ իրենց շահերին ստորադասել աշխարհի նոր քաղաքական տարածքը։ Եվ այս առումով Հայաստանի համար շատ կարևոր է պահպանել կայուն և բարեկամական հարաբերություններ բոլոր հնարավոր խաղացողների հետ։ Եվ, իհարկե, առաջին հերթին, Ռուսաստանի հետ", - կարծում է Դարբինյանը։

Այդ առնչությամբ նա Հայաստանից Ռուսաստան ծաղիկների կամ հայկական «Ջերմուկ» հանքային ջրի մատակարարման առնչությամբ ծագած խնդիրները գնահատել է որպես քաղաքական քայլ։ Դարբինյանը կարծում է, որ նույնպիսի շահարկում է գազի հարցի վրա ճնշումն է ։ "Բայց Հայաստանը կամավոր է գնացել դրան։ «Ջերմուկի» մատակարարման, ծաղիկների հետ կապված այսօրվա խնդիրները Հայաստանի իշխանությունների, ինչպես նաև հայ ընտրողների վրա ճնշում գործադրելու փորձ է՝", - եզրափակել է Դարբինյանը։