«Նաիրի» կինոթատրոնի վերադարձը. կինոն որպես իրադարձություն

Արմինֆո.Ավելի քան տասը տարի անց Երևանի գրեթե դարավոր պատմություն ունեցող «Նաիրի» կինոթատրոնի դռները կրկին բացվել են քաղաքացիների և մայրաքաղաքի հյուրերի առջև:

Այս վերադարձը սոսկ հերթական մշակութային իրադարձությունը չէ, այլ անդրադարձ Երևանի առաջին կինոթատրոններից մեկի ակունքներին, որի պատմությունը սկսվում է նախորդ դարասկզբին: Սկզբնապես այն գտնվում էր Ամիրյան փողոցում, իսկ 1950-ական թվականներին ստացավ նոր շենք՝ կառուցված ստալինյան նեոկլասիցիզմի ոճով՝ ճարտարապետ Ալեքսանդր Թամանյանի ճարտարապետական դպրոցի ներկայացուցիչ Գևորգ Թամանյանի նախագծով:

Հենց այստեղ են տեղի ունեցել առաջին խորհրդային ֆիլմերից մեկի՝ «Զարեի» ցուցադրությունները, ինչը հատուկ նշանակություն է տալիս այս վայրին ազգային կինովարձույթի կայացման պատմության մեջ:

Կինոթատրոնի ճակատագիրը հեշտ չի դասավորվել. ակտիվ գործունեության շրջաններին փոխարինելու են եկել երկարատև դադարները, երբ այն կա՛մ պարապուրդի էր մատնված, կա՛մ լիարժեքորեն չէր կատարում իր հիմնական գործառույթը:
Եվ այնուամենայնիվ, ինչպես հաճախ պատահում է իսկական մշակութային տարածքների հետ, «Նաիրին» չանհետացավ: Այն կարծես համբերատար սպասում էր իր վերադարձին: Այսօր սա արդեն սոսկ վերակառուցումից հետո վերաբացված կինոթատրոն չէ, այլ փորձ՝ վերադառնալու այն ելակետին, որտեղ կինոն դառնում է իրադարձություն, այլ ոչ թե սոսկ ֆոն: Սա ավելի շուտ վերածնունդ է, քան նոր փուլ՝ կորսված ձայնը վերականգնելու և իր հանդիսատեսին կրկին գտնելու ձգտում:
«ԱրմԻնֆո»-ի թղթակիցն այցելել է «Նաիրի» կինոթատրոն և ծանոթացել նորացված տարածքին, որտեղ ժամանակակից լուծումները չեն հակասում պատմությանը, այլ օրգանապես լրացնում և զարգացնում են այն:
Կինոթատրոնի տնօրեն Լիաննա Թամրազյանի հետ զրույցում հաջողվեց տեղեկանալ «Նաիրիի» տեսլականի և զարգացման հեռանկարների մասին, որն այսօր թևակոխում է իր պատմության նոր փուլ՝ խնամքով պահպանելով անցյալը և միևնույն ժամանակ վերստին հաստատվելով որպես քաղաքի մշակութային կյանքի կարևոր մաս:

Նորացված «Նաիրին» որպես ժամանակների կապ

Այս փուլում «Նաիրի» կինոթատրոնում գործում է մեկ նորացված դահլիճ՝ հագեցած էրգոնոմիկ բազկաթոռներով: Թամրազյանի խոսքով՝ հաջողվել է ձեռք բերել ժամանակակից տեխնիկական սարքավորումներ, այդ թվում՝ Christie CP2411-RBe 2K լազերային պրոյեկտոր և Dolby CP950 թվային ձայնային համակարգ:
«Քանի որ վերաբացվում ենք, պետք է, որ ամեն ինչ բարձր մակարդակի վրա լինի»,- ընդգծել է նա:

Գործող դահլիճում նախատեսված է 175 տեղ պարտերում և 20 տեղ պատշգամբում՝ VIP գոտում: Նախագծման ժամանակ նպատակ չի դրվել ավելացնել տեղերի քանակը և, համապատասխանաբար, առավելագույնի հասցնել տոմսերի վաճառքը. ընդհակառակը, բազկաթոռների միջև հեռավորությունները հաշվարկվել են՝ հաշվի առնելով էրգոնոմիկան, որպեսզի առաջին հերթին ապահովվի հարմարավետությունը կինոդիտման ժամանակ: Բազկաթոռներն իրենք մասնագիտացված են իտալական արտադրողի կողմից կինոթատրոնների համար. մեջքը չի հոգնում և չի քրտնում, ոչ մի անհարմարություն չկա նույնիսկ ֆիլմի երկարատև դիտման դեպքում:

Մոտակա ժամանակներս նախատեսվում է ավարտել վերակառուցումը և գործարկել ևս երկու դահլիճ՝ ավելի կամերային: Դա հնարավոր կդառնա օգտագործվող տարածքների վարձակալության հետ կապված իրավական հարցերի լուծումից հետո: Բացի այդ, հաշվի առնելով, որ «Նաիրի» կինոթատրոնն ունի տեղական նշանակության մշակութային հուշարձանի կարգավիճակ, համաձայն օրենքի՝ շենքի հարկի տակ այլ գործունեություն չի թույլատրվում:

Առանձնահատուկ ուշադրության է արժանի VIP գոտին, որը գտնվում է պատշգամբում՝ արտահայտիչ «կինոյի» ոճով պատրաստված բարի կողքին: Անհրաժեշտության դեպքում հյուրերը կարող են օգտվել լրացուցիչ ծառայություններից: VIP դահլիճի մուտքի մոտ նախատեսված է նաև լաունջ գոտի, որտեղ կարելի է ժամանակ անցկացնել մինչև սեանսի սկիզբը՝ թեթև հյուրասիրությամբ և հաճելի երաժշտության ներքո:
«Իմաստն այն է, որ այն ամենը, ինչ կարող է պետք գալ մարդուն ֆիլմ դիտելիս, նա կարողանա գտնել այստեղ: Դրա համար բոլոր պայմանները ստեղծված են»,- նշել է կինոթատրոնի տնօրենը:

Լիարժեք ձևաչափով հանդիսավոր բացումը, Թամրազյանի խոսքով, պետք է սպասել ամռան վերջին՝ ևս երկու դահլիճների գործարկումից հետո:

Պատասխանելով այն հարցին, թե ինչն էր սկզբունքորեն կարևոր պահպանել վերակառուցման ժամանակ, Լիաննա Թամրազյանը խոստովանել է, որ իր համար անձնապես գլխավորը հանդիսատեսին այս վայրի մասին հուշերը վերադարձնելն էր:
«Շատ երևանցիների համար «Նաիրի» կինոթատրոնը շատ թանկ է. սա երիտասարդության, հանդիպումների, բացահայտումների վայր է: Եվ արդեն այսօր ես շատ ջերմ արձագանքներ եմ լսում այն մասին, որ կինոթատրոնը կրկին բացվել է»,- կիսվել է նա:

Ի՞նչ են այժմ ցուցադրում կինոյում:

Այն ժամանակ, երբ «Նաիրի» կինոթատրոնը երկրորդ կյանք ստացավ 2000-ականների սկզբի վերակառուցումից հետո, տնօրենի խոսքով, այն շատ առումներով առաջ էր իր ժամանակից: Այդ ժամանակ Երևանում կինոթատրոնային մշակույթը անկում էր ապրում, և կինոն այնքան պահանջված չէր, որքան այսօր:
Այսօր, սակայն, արդյունաբերությունը զարգանում է ոչ միայն վարձույթի տեսանկյունից, այլև հայրենական կինոարտադրության ակտիվ աճի հաշվին: Թամրազյանի կարծիքով՝ հայկական կինոյի հանդեպ առանձնահատուկ հետաքրքրություն է ցուցաբերում հենց երիտասարդ սերունդը:
«Մենք դա հաշվի կառնենք: Կարծում եմ՝ կարևոր է աջակցել մեր արտադրողներին, որովհետև հիմա էկրանների պակաս է զգացվում, մինչդեռ հեղինակներն իրենք գնալով շատանում են, և դա շատ լավ է»,- նշել է նա:
Միևնույն ժամանակ, նրա խոսքով, ռեպերտուարում նախկինի պես ներկա կլինեն թե՛ կոմերցիոն հիթերը, թե՛ հեղինակային կինոն, թե՛ կլասիկ ֆիլմերը:
Այսպիսով ձևավորվում է միջժանրային հավասարակշռություն, ինչը ժամանակի ընթացքում թույլ կտա կինոթատրոնին մշակել իր սեփական, ճանաչելի ձեռագիրը:

Կինո և տեխնոլոգիաներ. նոր փորձառություն հանդիսատեսի համար

«Նաիրի» կինոթատրոնի թիմի համար առանցքային ուղղություններից մեկը դարձավ սեփական՝ Nairi Cinema հավելվածի ստեղծումը, որը պետք է դառնա ոչ թե պարզապես տոմսերի գնման ծառայություն, այլ լիարժեք հարթակ հանդիսատեսի հետ շփման համար: Հավելվածի միջոցով հյուրերը կկարողանան հետևել ազդագրին, ստանալ հատուկ առաջարկներ և դառնալ կինոթատրոնի մշտական այցելուների համայնքի մի մասը: Ապագայում այստեղ պլանավորում են զարգացնել լոյալության ակումբ՝ փակ միջոցառումների, հատուկ ցուցադրությունների և թեմատիկ late night (ուշ երեկոյան) սեանսների հասանելիությամբ:
Ընդ որում, հավելվածը կդառնա ավելի լայն գաղափարի մաս՝ կինո գնալը դարձնել առավելագույնս անհատական և իմերսիվ (ընկղմող) փորձառություն: Կինոթատրոնում մտածել են թեմատիկ լուսավորության համակարգ. դահլիճում լույսի գույնը կփոխվի՝ կախված ֆիլմի մթնոլորտից՝ ստեղծելով միասնական 

տարածություն էկրանի և հանդիսատեսի միջև: Թամրազյանի խոսքով՝ կարևոր է, որ մարդը ոչ թե պարզապես կինո դիտի, այլ բառացիորեն հայտնվի դրա տրամադրության ներսում:
Հենց այդ պատճառով հանդիսատեսին ցանկանում են հնարավորություն տալ մասնակցելու այդ մթնոլորտի ստեղծմանը: Հավելվածի միջոցով օգտատերերը կկարողանան քվեարկել ցուցադրությունից առաջ դահլիճի գունային ձևավորման օգտին՝ ազդելով տարածության տեսողական տրամադրության վրա: Այս փոքրիկ, բայց անսովոր դետալը, հեղինակների մտահղացմամբ, հանդիսատեսին դիտորդից վերածում է տեղի ունեցողի մի մասնիկի:
Թիմը նաև հույս ունի, որ այս ձևաչափը կօգնի ներգրավել երիտասարդ լսարանին, այդ թվում՝ թվային ծառայությունների, բջջային հավելվածի և հանդիսատեսի հետ փոխգործակցության ավելի ժամանակակից ձևաչափի շնորհիվ:

Փառատոնային կյանք

Առանձին ուղղություն, որը կինոթատրոնի թիմը ցանկանում է զարգացնել, «Նաիրիի» վերադարձն է ակտիվ փառատոնային կյանքին: 2000-ականների սկզբին հենց «Նաիրի» կինոթատրոնը՝ «Մոսկվա» կինոթատրոնի հետ միասին, ընդունում էին «Ոսկե ծիրան» միջազգային կինոփառատոնը: Պլաններում կա կրկին կինոթատրոնում հարթակ ստեղծել կինոհանդիպումների և կինեմատոգրաֆիական երկխոսության համար:
Կինոթատրոնի տնօրեն Լիաննա Թամրազյանը նշեց, որ թիմին հոգեհարազատ է միջազգային փառատոնների, հատուկ ցուցադրությունների և մշակութային նախագծերի ձևաչափը, որոնք միավորում են հանդիսատեսին կինոյի շուրջ: Սակայն խոսքը վերաբերում է ոչ միայն խոշոր փառատոններին, այլև թեմատիկ ազգային, պատմական ծրագրերին, երաժշտական երեկոներին, պերֆորմանսներին, մշակութային կազմակերպությունների հետ համատեղ նախաձեռնություններին:
Թամրազյանի խոսքով՝ նորացված «Նաիրին» իրեն դիտարկում է որպես համագործակցության համար բաց հարթակ և պատրաստ է ընդունել միջազգային հյուրերի, ռեժիսորների և ոլորտի ներկայացուցիչների: Նա նկատեց, որ կինոթատրոնը բաց է բանակցությունների, նոր գործընկերությունների և գաղափարների համար, որոնք կօգնեն տարածությանը վերադարձնել քաղաքի կարևոր մշակութային կենտրոններից մեկի կարգավիճակը:

Հայացք դեպի ապագա

Այն հարցին, թե ինչպիսին եք տեսնում կինոթատրոնը հաջորդ 5-10 տարիների կտրվածքով, Լիաննա Թամրազյանը պատասխանեց հետևյալը. «Եթե անկեղծ, տեսնում եմ լեփ-լեցուն, այն իմաստով, որ ինձ թվում է՝ սա պետք է լինի ոչ թե կինոթատրոն իր դասական իմաստով՝ եկար, դիտեցիր կինոն ու գնացիր, այլ «Նաիրին» պետք է դառնա իրադարձությունների կինոթատրոն»:

Տնօրենը համոզմունք հայտնեց, որ ժամանակի ընթացքում կհաջողվի յուրաքանչյուր ֆիլմի շուրջ ստեղծել առանձնահատուկ մթնոլորտ, կհաջողվի բացահայտել ֆիլմը՝ անցկացնելով լրացուցիչ միջոցառումներ, այդ թվում՝ հանդիպումներ դերասանների, ռեժիսորների հետ, թեմատիկ երեկոների անցկացում երիտասարդության ներգրավմամբ, հատուկ ցուցադրություններ:

Թիմը ձգտում է նրան, որ «Նաիրին» մշտապես շարժման մեջ լինի: Կինոթատրոնում ցանկանում են պահպանել «կենդանի տարածության» զգացողությունը, որտեղ միշտ ինչ-որ նոր բան է տեղի ունենում, և ուր հանդիսատեսը վերադառնում է ոչ միայն ազդագրի, այլև հենց մթնոլորտի համար: Լավ գաղափարներ, իրականում, ինչպես նշեց Թամրազյանը, շատ կան, և թիմը պատրաստ է աշխատել դրանց իրագործման ուղղությամբ: