Նարեկ Կարապետյանը Հայաստանի ընդդիմությանը կոչ է արել հիշել, որ պայքարը Հայրենիքի պահպանման համար է

Արմինֆո."Ուժեղ Հայաստան" կուսակցության քաղաքական խորհրդի անդամ Նարեկ Կարապետյանն ընդդիմադիր ուժերին և ընդդիմադիր հայացքներ ունեցող քաղաքացիներին կոչ է արել հիշել, որ այսօր իրենք պայքարում են հանուն Հայրենիքի և միայն միասին կարող են երկրում փոփոխություններ իրականացնել:

Այդ մասին նա հայտարարել է Հայաստանի խորհրդարանի շենքի մոտ մամուլի ասուլիսի ժամանակ, որտեղ մեկնարկել է Սամվել Կարապետյանի "Ուժեղ Հայաստան" դաշինքի նախընտրական քարոզարշավը՝ հունիսի 7-ին կայանալիք ընտրությունների առնչությամբ: Կուսակցության խորհրդի անդամը հիշեցրել է, որ 8 տարի առաջ հենց այս օրը Նիկոլ Փաշինյանը Հայաստանի խորհրդարանում ընտրվեց Հայաստանի վարչապետ: "Նա դարձավ վարչապետ, խոստանալով բարեկեցություն և խաղաղություն բերել ինչպես Հայաստանում, այնպես էլ Արցախում։ 8 տարի նա խոստանում  էր, որ երկիրը կունենա արդար համակարգ, որ այն կծաղկի, մարդիկ կսկսեն լավ ու անվտանգ ապրել։ Նրանց խոստումները շատ էին։ 8 տարի անց մենք կանգնած ենք նույն փողոցում, եւ գրեթե ոչինչ չի փոխվել, բացի նրանից, որ փոքրացել է մեր երկիրը", - ուշադրություն է հրավիրել Կարապետյանը։ Նա հիշեցրել է, որ հենց գործող իշխանության օրոք երկիրն անցել է երեք պատերազմի միջով, ձեռք բերել 10 000 դոլար պարտք՝ Հայաստանի յուրաքանչյուր ընտանիքի համար, կրկնապատկել հարկերը փոքր բիզնեսի համար: Իսկ երկրում աղքատությունը հաղթահարելու փոխարեն, ըստ կուսակցության քաղխորհրդի անդամի, Հայաստանի իշխանություններն իրենց պարգևավճարներ են բաժանել,  "Քաղաքացիական պայմանագիր" կուսակցության բոլոր անդամները պաշտոններ են ստացել: "Թավշյա հեղափոխությունից հետո 8 տարվա ընթացքում օգուտ է ստացել միայն մարդկանց որոշակի մի խումբ, իսկ հայ ժողովուրդն այն ամենին, ինչին հասել է, հասել է բացառապես իր աշխատանքով։ Պետությունը դրանում ոչ մի վաստակ չուներ", - կարծում է Կարապետյանը։

Կուսակցության քաղխորհրդի անդամի խոսքով՝ ըստ պաշտոնական տվյալների, այսօր Հայաստանում յուրաքանչյուր հինգերորդ մարդ ապրում է աղքատության մեջ: Այսինքն, ինչպես պարզաբանել է Կարապետյանը, մոտ 600 000 հայ այսօր աղքատ է։ Նա ուշադրություն է հրավիրել այն հանգամանքի վրա, որ երկիրը գրեթե չունի առեւտրային գործընկերներ, եւ հարաբերությունների խզումը նրանց հետ, ովքեր մնացել են, կզրկի Հայաստանի քաղաքացիներին արտագնա աշխատանքի հնարավորությունից, հատկապես, այն ոլորտներում, որտեղ պետությունը չի կարողացել աշխատատեղեր ստեղծել: "Հայաստանը միլիարդավոր դոլարներ է արտահանում, մեր գյուղատնտեսական մշակաբույսերն ամբողջությամբ արտահանվում են, այդ ամենը ռիսկի տակ է։ Այդպես չի կարելի վերաբերվել սեփական ժողովրդին։ Բացի այդ, գործող իշխանությունների օրոք սկսեց օգտագործվել բառապաշար, որը նախկինում արգելված էր։ Ամեն օր մենք հանդիպում ենք վիրավորանքների, որոնց հեղինակը Հայաստանի վարչապետն է", - նշել է "Ուժեղ Հայաստան" կուսակցության քաղխորհրդի անդամը։ Մինչդեռ, ըստ Կարապետյանի, ընտրություններում հաղթելու դեպքում իրենց առաջնային խնդիրը լինելու է առաջին 3-4 ամիսների ընթացքում աղքատության վերացումը: "Մենք ունենք ծրագիր, որը ենթադրում է ամսական 150 000 դրամ տրամադրել յուրաքանչյուր հինգ հոգանոց ընտանիքի՝ ծայրահեղ աղքատությունը հաղթահարելու համար։ Այդ գումարի 70%-ը կտրամադրեն սփյուռքահայ գործարարները, և միայն 30%- ը՝ պետությունը։ Ուրիշ ոչ ոք Հայաստանում չի կարող իրականացնել այդ նախագիծը, քանի որ ոչ մի սփյուռքահայ գործարար, կապիտալի սեփականատեր գործող իշխանության հորդորով դա չի անի", - նշել է Կարապետյանը, հիշեցնելով, որ նրանցից շատերն իրենց բարեկամ են։ Ինչպես պարզաբանել է կուսակցության քաղխորհրդի անդամը, ծրագիրը կիրականացվի առաջին փուլում եւ կօգնի այդ ընտանիքներին հաղթահարել ծայրահեղ աղքատությունը, որից հետո նրանք մտադիր են 5 տարվա ընթացքում իրականացնել Հայաստանում աշխատատեղերի ստեղծման իրենց ծրագիրը:

"Այսօր վտանգված է նաև Հայաստանի անվտանգությունը։ Այն կարող է ապահովել միայն համալիր ռազմական արդյունաբերությունը, ինչպես նաև բանակի վերափոխումը: Մեզ այսօր մնացել է 2-3 գործընկեր, ում հետ մենք դեռեւս առեւտուր ենք վարում, ում հետ պահպանվել է նվազագույն ռազմական համագործակցությունը, բայց մենք կարող ենք կորցնել և դա", - նկատել է Կարապետյանը:

Արտաքին քաղաքական փոխգործակցության մասով նա նշել է, որ ԱՄՆ գործող վարչակազմի հետ համագործակցության մեծ ներուժ են տեսնում: "Միևնույն ժամանակ, մենք պետք է հասկանանք, որ մի շարք եվրոպական առաջնորդներ կարող են փոխվել իրենց երկրներում ընտրությունների արդյունքում։ Օրինակ, պետք է հասկանալ, թե մեկ տարի անց ով է լինելու Ֆրանսիայում իշխանության ղեկին", - ուշադրություն է հրավիրել Կարապետյանը։ Այդ առնչությամբ նա նաև նշել է, որ հենց գործող իշխանությունների օրոք արտահանումը դեպի Ֆրանսիա 20 տոկոսով նվազել է, իսկ դեպի Ռուսաստան, ընդհակառակը, զգալիորեն աճել է: Վերն ասվածի առնչությամբ կուսակցության քաղխորհրդի անդամը կոչ է արել բոլոր ընդդիմադիր ուժերին և ընդդիմադիր հայացքներ ունեցող քաղաքացիներին հիշել, որ այսօր նրանք պայքարում են հանուն ընդհանուր Հայրենիքի, և այսօր երկիրը փոփոխությունների կարիք ունի: "Միակ բանը, որին հասել են այս իշխանությունները, սովորել են պարտք վերցնել և ծախսել։ Մեզ փոփոխություններ են պետք։ Խորհրդարանի շենքը տեսնելիս մարդիկ չպետք է բացասական զգացմունքներ ունենան, այն պետք է հույս ներշնչի", - ամփոփել է Նարեկ Կարապետյանը ։