Մոսկվա. Հայաստանում ԵՄ նոր քաղաքացիական առաքելության նպատակը հանրապետության ներքին գործերին միջամտելն է

Արմինֆո.Մոսկվայում համոզված են, որ Հայաստանում ԵՄ նոր քաղաքացիական առաքելության նպատակը երկրի ներքին գործերին միջամտելն է։ Այս մասին ապրիլի 24-ին կայացած ամենշաբաթյա ճեպազրույցի ժամանակ հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան։

Նա հիշեցրել է, որ ապրիլի 21-ին ԵՄ արտաքին գործերի նախարարների խորհուրդը որոշում է կայացրել Հայաստան գործընկերային առաքելություն ուղարկելու մասին։ «Խոսքը տվյալ երկրում երկրորդ քաղաքացիական առաքելության մասին է։ Ակնհայտ է, որ նոր մեխանիզմը, որը եվրոպացիների կողմից մատուցվում է որպես օգնություն Երևանին հիբրիդային սպառնալիքների դեմ պայքարում, Բրյուսելին լրացուցիչ լծակներ կտա հայկական նախարարությունների և ազգային ինստիտուտների վրա ազդելու համար. սա նույնպես հասկանալի է, ակնհայտ, և, ի դեպ, Բրյուսելում դա նույնպես ոչ ոք չի թաքցնում։ Ապօրինի ֆինանսական հոսքերին հետևելու, կիբերհարձակումներին հակազդելու, տեղեկատվական մանիպուլյացիաների և երրորդ երկրների տեղեկատվական միջամտության դեմ պայքարի պատրվակով ԵՄ-ն կփորձի միջամտել Հայաստանի ներքին գործերին», - համոզմունք է հայտնել Զախարովան՝ կոչ անելով իրերն իրենց անուններով կոչել։

Նա համոզմունք է հայտնել, որ ԵՄ-ում կցանկանան նաև ազդել հունիսի 7-ին Հայաստանում կայանալիք խորհրդարանական ընտրությունների ելքի վրա։ Որպես իր խոսքերի ապացույց նա բերել է այն փաստարկը, որով ուղարկվում է առաքելությունը՝ «ապօրինի ֆինանսական հոսքերի վերահսկում»։ Զախարովան վստահություն է հայտնել, որ եթե ԵՄ-ում ցանկանային հետևել ապօրինի ֆինանսական հոսքերին, ապա ավելի տրամաբանական կլիներ նման առաքելություն ուղարկել Ուկրաինա, այլ ոչ թե Հայաստան։ «Այդ դեպքում ինչո՞ւ են նրանք առաքելություն ուղարկում Հայաստան, այլ ոչ թե Ուկրաինա։ Որովհետև նրանց նպատակը ոչ թե վերահսկելն է, այլ ազդելը՝ քաղաքականապես ազդելն ու մանիպուլյացիայի ենթարկելը», - հավելել է ռուս դիվանագետը։

Նրա խոսքով՝ առաքելությունը, որը բառերով պատրաստվում է պայքարել ինչ-որ միջամտությունների դեմ, ինքնին հանդիսանում է նման միջամտության գործիք։ Զախարովան հիշեցրել է, որ նմանատիպ գործընկերային առաքելություն գործում է Մոլդովայում, և բոլորը քաջածանոթ են այդ գործունեության արդյունքներին։

«Բազմիցս ընդգծել ենք, որ Հարավային Կովկասում արտատարածաշրջանային ուժերի, այդ թվում՝ Եվրոպական միության և այլ կառույցների ներկայության ընդլայնումը հակասում է տարածաշրջանային պատասխանատվության սկզբունքին, երբ տարածաշրջանի խնդիրները լուծվում են հենց այդ երկրների և նրանց հարևանների կողմից։ Այն նաև ռիսկեր է պարունակում Եվրասիայի այս հատվածի շատ փխրուն կայունության համար։ Վաղուց հայտնի է, թե ինչին է ուղղված արևմտաեվրոպական քաղաքական միտքը՝ իր դատարկ խոստումներով ներքաշել գործընկերներին սեփական կոորդինատային համակարգի մեջ։ Իսկ այն, որպես կանոն, ռուսոֆոբիկ է, որից հետո նրանց ձեռքերով լուծում են սեփական խնդիրները», - շարունակել է ՌԴ ԱԳՆ պաշտոնական ներկայացուցիչը։

Միևնույն ժամանակ, Զախարովան ընդգծել է, որ Մոսկվայում տեսնում են, թե ինչպես է ԵՄ-ն, որը որդեգրել է «միլիտարիզացիայի ուղղի՝ հանուն առասպելական ռուսական սպառնալիքին դիմակայելու, ձգտում Հայաստանը վերածել իր ֆորպոստի»։ «Այս ամենը խիստ հակասում է Երևանի պաշտոնական կուրսին՝ չծառայել որպես մանրադրամ երրորդ երկրների շահերի համար։ Հայաստանի համաձայնությունը նոր առաքելության տեղակայմանը, ինչպես ձևակերպում են եվրոպացիները, ըստ ամենայնի, կապված է նրանով, որ դրա օգնությամբ ղեկավարությունը հույս ունի արագացնել իր առաջխաղացումը եվրոպական ուղիով։ Պարզապես պետք չէ շփոթել Եվրամիությանն անդամակցելու ճանապարհը (իսկ այդ ճանապարհին արդեն քիչ չեն դոփող պետությունները) եվրոպական ուղու հետ։ Ինչպես ինձ է թվում, ոչ թե ԵՄ անդամակցությունն է պետք Հայաստանին, ինչպես և Մոլդովային, այլ ինչ-որ «եվրոպական ուղի», իսկ դա հաստատ այնտեղ տանող ճանապարհը չէ», - շարունակել է ռուս դիվանագետը։

Միաժամանակ Զախարովան ընդգծել է, որ ազգային տնտեսությանը և բնակչության բարեկեցությանը հասցված վնասը մեղմելու համար օգնություն հաստատ չի լինի, եթե Երևանը վերակողմնորոշվի ոչ թե դեպի ԵՄ անդամակցություն, այլ պարզապես դեպի ԵՄ և եվրոպական պահանջներ։ «Մենք ակնկալում ենք, որ մեր հայ դաշնակիցներն ու ընկերները թույլ չեն տա օգտագործել այսպես կոչված նոր առաքելությունը սեփական ներքին գործերին միջամտելու և Երևանին Արևմուտքի աշխարհաքաղաքական խաղերի մեջ ներքաշելու համար, ինչը ենթադրում է մեր երկրի հետ բարեկամական կապերի քայքայում և միացում Բրյուսելի հակառուսական քաղաքականությանը», - եզրափակել է Զախարովան։

Ապրիլի 21-ին ԵՄ արտաքին գործերի նախարարների խորհուրդը հավանություն է տվել Հայաստան նոր քաղաքացիական առաքելություն ուղարկելու որոշմանը։ Այն նախատեսված կլինի երկու տարվա համար։ Ըստ տեղեկատվության՝ «առաքելությունը կամրապնդի Հայաստանի դիմակայունությունը հիբրիդային սպառնալիքների նկատմամբ՝ տրամադրելով ռազմավարական, գործնական խորհրդատվություն և աջակցություն նախարարություններին ու անվտանգության մարմիններին»։ Այդ խորհրդատվությունները կենտրոնացած կլինեն քաղաքականության մշակման, տեղեկատվության արտաքին մանիպուլյացիաների, կիբերհարձակումների, ինչպես նաև ապօրինի ֆինանսական հոսքերի հայտնաբերման և դրանց արձագանքման վրա։ Առաքելությունը նաև կգնահատի, թե ինչ է անհրաժեշտ Հայաստանի անվտանգային կարողությունների զարգացման համար, որպեսզի երկիրը կարողանա ավելի արդյունավետորեն բացահայտել հիբրիդային սպառնալիքները և արձագանքել դրանց՝ ԵՄ մեթոդաբանություններին ու ստանդարտներին համապատասխան։

Հիշեցնենք, որ ավելի վաղ «Ազատություն» ռադիոկայանը հայտնել էր, որ իրենց տրամադրության տակ է հայտնվել Հայաստանի արտաքին գործերի նախարար Արարատ Միրզոյանի նամակը Բրյուսելին, որում նա «խնդրել էր արագ արձագանքման խումբ ուղարկել Երևան՝ կրեմլյան ապատեղեկատվությանը և Հայաստանի խորհրդարանական ընտրություններին ռուսական միջամտությանը հակազդելու համար, իսկ հետագայում, հնարավոր է, նաև ավելի մշտական քաղաքացիական առաքելություն»։ Այս կապակցությամբ հիշեցվում էր, որ ԵՄ-ն անցյալ տարվա խորհրդարանական ընտրությունների ժամանակ շուրջ 20 հոգուց բաղկացած նմանատիպ խումբ էր ուղարկել Քիշնև՝ «օգնելու մոլդովական իշխանություններին հայտնաբերել և հակազդել սոցիալական ցանցերում Ռուսաստանից տարածվող ապատեղեկատվությանը»։ Հավելենք նաև, որ ավելի վաղ ԵՄ գլխավոր դիվանագետ Կայա Կալասը հայտարարել էր Հայաստանին 15 միլիոն եվրո հատկացնելու մասին՝ «ռուսական քարոզչությանը հակազդելու» համար։