"Ուժեղ Հայաստանը"՝ ոստիկաններին առնչվող ՃՏՊ-ի մասին. Էս մարդը էլի լույսը չբացված տնից դուրս եկավ ու դժբախտություն բերեց գլխներիս

Արմինֆո.  Հայաստանի սոցիալական ցանցերում ակտիվ քննարկումներ են ծավալվել ապրիլի 11-ին Նիկոլ Փաշինյանին Լոռու մարզ ուղեկցող ոստիկանական ավտոբուսի ողբերգական վթարի առնչությամբ, որի հետևանքով 1 մարդ զոհվել է, 11-ը ՝ վիրավորվել:

Հայտնի իրավապաշտպան Ռուբեն Մելիքյանը Facebook - ի իր էջում նշել է. "Հերթական զոհը՝ մահաբեր նիկոլի պատճառով - մեր հարկերի հաշվին իրեն ուղեկցող ոստիկանական ավտոբուսը բախվել է մարդատար մեքենայի։ Մեկ զոհ և բազմաթիվ վիրավորներ։

Կարևոր է փաստել, որ մահաբերի ուղևորությունը ՊԵՏԱԿԱՆ գործառույթի հետ կապ չուներ, այլ կապված էր նրա քաղաքական գործունեության հետ"։

ԱԺ ընդդիմադիր "Հայաստան" խմբակցության պատգամավոր Քրիստինե Վարդանյանն, իր հերթին,  նշել է, որ Փաշինյանի տեղաշարժերը դարձել են հանրային անվտանգության խնդիր։

«Ցավակցում եմ Փաշինյանի ՇԱՌասյանը զոհ դարձած քաղաքացու ընտանիքին ու հարազատներին, առողջություն մաղթում վիրավորներին։ Փաշինյանի տեղաշարժն իսկապես վերածվել է հանրային անվտանգության հարցի, դրա համար երևի անհրաժեշտ է մշակել ուղեցույց՝ նման իրավիճակներից հնարավորինս խուսափելու համար։

ՈՒՂԵՑՈՒՅՑ ՔԱՂԱՔԱՑԻՆԵՐԻ ՀԱՄԱՐ. Ինչպե՞ս ողջ մնալ «Ժողովրդավարության Բաստիոնում»

Հաշվի առնելով վերջին շրջանում շրջիկ խմբի անկանխատեսելի զբոսանքները՝ ներկայացնում ենք անվտանգության կանոնների հատուկ փաթեթ՝ բանտից և հիվանդանոցից խուսափելու համար։

1. Պահպանե՛ք հեռավորություն

Տեսա՞ք Փաշինյանին ու իրեն ուղեկցող «թափառող խմբին»՝ մի՛ մոտեցեք։ Հիշե՛ք, նրա հետ խոսակցությունը կարող է ավարտվել կա՛մ բանտում, կա՛մ հիվանդանոցում։ Նրա «սերը» թանկ հաճույք է, որի դիմաց վճարելու եք դուք։ Մի՛ շփվեք, հարցեր մի՛ տվեք. հիշե՛ք, նա «սիրում է» բոլորիդ, բայց այդ սերը հաճախ ավարտվում է քրեական գործերով։

2. Երթուղու կտրուկ փոփոխություն

Եթե հեռվում նկատում եք կասկածելի աշխուժություն, անմիջապես փոխե՛ք ձեր ճանապարհը։ Ավելի լավ է մի քանի կիլոմետր ավել քայլել, քան մահանալ կամ դատվել։ Գնացեք հակառակ ուղղությամբ. դա անվտանգության հարց է։

3. Անտեսե՛ք

Եթե ճակատագրի հեգնանքով հայտնվել եք նույն տարածքում ու հեռանալու տեղ չկա, կիրառե՛ք «չտեսնելու» արվեստը։ Նայե՛ք երկնքին, հաշվե՛ք ծառերի տերևները կամ ձևացրեք, թե շատ կարևոր հեռախոսազանգի եք պատասխանում։ Այս հնարքը կարող է կյանքեր փրկել։

4. Փրկե՛ք երեխաներին

Սա կատակ չէ. երեխաներին կտրականապես հեռու պահեք այդ տեսարաններից։ Դա նրանց կազատի տրավմաներից։

5. Խուսափե՛ք ՇԱՌասյունից

Հատկապես խուսափեք Փաշինյանի մահաբեր ՇԱՌասյունից, այդ ՇԱՌասյունը արդեն խլել է հղի կնոջ կյանք, պատճառ է դարձել մեկ այլ քաղաքացու մահվան ու անընդհատ վտանգում է հասարակական կարգը։ Հեռվից ՇԱՌասյունը նկատելու դեպքում փոխեք ձեր երթուղին։

Տարածե՛ք, որ մարդիկ զգույշ լինեն։ Անվտանգությունը՝ ամեն ինչից վեր է», - գրել է պատգամավորը՝ «Ֆեյսբուքի» իր էջում։

"Ուժեղ Հայաստան" կուսակցության վարչության անդամ Ալիկ Ալեքսանյանը նշել է, որ Գնթունիկում կանգ առնելն ավելի կարևոր էր, քան վթարից տուժածներին օգնելը: «Էս մարդը էլի լույսը չբացված տնից դուրս եկավ ու դժբախտություն բերեց գլխներիս։ Բա չհասնեի՞ք, տեսնեիք՝ ինչ օգնություն է պետք, թե ձեր համար ավելի կարևոր էր Գնթունիքում կանգնել, կոֆե խմելը, մի բան ուտելը»,- նշել է "Ուժեղ Հայաստան" կուսակցության վարչության անդամը։

Հիշեցնենք, որ վթարի է ենթարկվել ՀՀ ներքին գործերի նախարարության ավտոբուսը, որը Երևանից Լոռու մարզ էր մեկնում ՀՀ վարչապետ Նիկոլ Փաշինյանի և կառավարող "Քաղաքացիական պայմանագիր" կուսակցության նրա զինակիցների ներկուսակցական քարոզարշավի ժամանակ հասարակական կարգն ապահովելու նպատակով: Դեպքը տեղի է ունեցել ապրիլի 11-ին ՝ առավոտյան ժամը 7:50-ի սահմաններում Քուչակ-Ապարան ավտոճանապարհին, որտեղ ոստիկանների տեղափոխող Honda ավտոբուսը բախվել է Nissan ավտոմեքենային: Ըստ նախնական տվյալների՝ վթարի հետևանքով 1 մարդ մահացել է, 12-ը դիմել են բուժօգնության: